SacredTradition :: Library
русский  english    
ԳՐԱԴԱՐԱՆ
ԳՐԱԴԱՐԱՆ / ՀԱՆՐԱԳԻՏԱՐԱՆ
Ա | Բ | Գ | Դ | Ե | Զ | Է | Ը | Թ | Ժ | Ի | Լ | Խ | Ծ | Կ | Հ | Ձ | Ղ | Ճ | Մ | Յ | Ն | Շ | Ո | Չ | Պ | Ջ | Ս | Վ | Տ | Ց | ՈՒ | Փ | Ք | Օ

ՏԱԹԵՎԻ ՎԱՆՔ
id470Գտնվում է Սյունիքի մարզի Տաթև գյուղի հարավային կողմում՝ Որոտան գետի վտակի անդնդախոր ձորի եզրին: Ըստ ավանդության՝ վանքն իր անունը ստացել է ս. Թադեոս առաքյալի աշակերտ Եվստաթեից, որը քրիստոնեություն է քարոզել Սյունիքում և այնտեղ նահատակվել: Դեռևս V-VIII դդ. Տաթևի վանքը եղել է դպրության առաջնակարգ կենտրոն, իսկ VIII դ. վերջում դարձել է Սյունյաց եպիսկոպոսության աթոռանիստը: XIV դ. հռչակվել է իր նշանավոր համալսարանով:

Տաթևի վանքի ընդհանուր տեսքը հարավ-արևմուտքից
Լուսանկար՝ Զավեն Սարգսյանի

Առաջին եկեղեցին կառուցվել է IV դ.: 895-906 թթ. Հովհաննես եպիսկոպոսը կառուցել է հայկական ամենախոշոր եկեղեցիներից մեկը՝ Ս. Պողոս-Պետրոս տաճարը, որի խոշոր գմբեթը հիմնված է հզոր մույթերի և արևմտյան ավանդատների անկյունների վրա: Տաճարի կառուցման ավարտը նշանավորվել է 906 թ. նրա հարավային կողմում հուշասյուն կանգնեցնելով (կոչվել է «Գավազան»), որը շարնիրային (հոդակապայթ) սկզբունքով իրականացված հիմքի շնորհիվ ճոճվել է: 930 թ. Ս. Պողոս-Պետրոս տաճարը զարդարվել է բարձրարվեստ որմնանկարներով:
1046-ին կառուցվել է վանքի Ս. Գրիգոր թաղածածկ եկեղեցին, 1087-ին՝ վանքի դարպասը, և վրան՝ Ս. Աստվածածին կենտրոնագմբեթ եկեղեցին: Ս. Պողոս-Պետրոս տաճարի գմբեթը 1138 թ. երկրաշարժից ընկել է և քանդել Ս. Գրիգոր եկեղեցին, որը 1295-ին հիմնովին վերակառուցել է Ստեփանոս Օրբելյանը: XVII դ. կառուցվել են պարիսպները, բնակելի և տնտեսական շենքերը: Տաճարի արևմտյան ճակատին կից XX դ. սկզբին կառուցվել է եռահարկ բարձր զանգակատուն: Տաթևի վանքն ավերվել է 1931-ի երկրաշարժից և վերակառուցվել 1974-1998 թթ.:
 
sacredtradition.am