---

Կարգաւորութիւն հասարակաց աղօթից Երեկոյի ժամուն,
որ կատարի ի դէմս Որդւոյն Աստուծոյ, որ էջ ի խաչէն եւ պատեալ պաստառակալաւ՝ եդաւ ի գերեզմանի

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Ես առ Աստուած կարդացի, եւ Նա լուաւ ինձ յերեկոյս, ի վաղորդայն եւ ի հասարակ աւուր:
Սպասէի Աստուծոյ իմոյ եւ ակն ունէի Կենարարին, որ փրկէ զծառայս Իւր եւ կեցուցանէ:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՁԵ
Խոնարհեցո՛, Տէ՛ր, զունկն Քո եւ լո՛ւր ինձ, զի աղքատ եւ տնանկ եմ ես:
Պահեա՛ զանձն իմ սուրբ, Տէ՛ր. փրկեա՛ զծառայս Քո, Աստուա՛ծ իմ, որ ի Քեզ յուսացայ:
Ողորմեա՛ ինձ, Տէ՛ր, զի առ Քեզ աղաղակեցի զօրհանապազ. ուրա՛խ արա զանձն ծառայի Քո, զի առ Քեզ, Տէ՛ր, համբարձի զանձն իմ.
Զի Դու, Տէ՛ր, քաղցր եւ ուղիղ ես, բազումողորմ առ ամենեսեան, որ կարդան առ Քեզ:
Ո՛ւնկն դիր, Տէ՛ր, աղօթից իմոց եւ նայեա՛ց ի ձայն խնդրուածաց իմոց:
Յաւուր նեղութեան իմոյ կարդացի առ Քեզ, եւ լուար ինձ:
Ոչ ոք է նման Քեզ յաստուածս, Տէ՛ր, եւ ոչ ոք է որպէս զգործս Քո:
Զամենայն ազգս, զոր արարեր, եկեսցեն եւ երկիր պագցեն առաջի Քո եւ փառաւոր արասցեն զանուն Քո յաւիտեան:
Մեծ ես Դու, Տէ՛ր, եւ առնես սքանչելիս եւ Դու միայն ես Աստուած:
Առաջնորդեա՛ ինձ ի ճանապարհի Քում, եւ գնացից ի ճշմարտութեան Քում, եւ ուրախ եղիցի սիրտ իմ երկնչել յանուանէ Քումմէ:
Խոստովան եղէց առ Քեզ, Տէ՛ր Աստուած իմ, բոլորով սրտիւ իմով, փառաւոր արարից զանուն Քո յաւիտեան:
Մեծ եղեւ ի վերայ իմ ողորմութիւն Քո, Տէ՛ր, եւ փրկեցեր զանձն իմ ի դժոխոց ներքնոց:
Աստուա՛ծ, անօրէնք յարեան ի վերայ իմ, եւ ժողովք հզօրաց խնդրեցին զանձն իմ եւ ոչ համարեցան զՔեզ Աստուած առաջի իւրեանց:
Այլ Դու, Տէ՛ր Աստուած իմ, գթած ես եւ ողորմած, երկայնամիտ, բազումողորմ եւ ճշմարիտ. նայեա՛ց առ իս եւ ողորմեա՛ ինձ:
Տո՛ւր զօրութիւն ծառայի Քո, կեցո՛ զորդի աղախնոյ Քո եւ արա՛ առ իս նշան բարութեան:
Տեսցեն ատելիք իմ եւ ամաչեսցեն, զի Դու, Տէ՛ր, օգնեցեր ինձ եւ մխիթարեցեր զիս:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՄԱՂԹԱՆՔ
Փա՜ռք Քեզ, Աստուա՛ծ, փա՜ռք Քեզ. յաղագս ամենայնի, Տէ՛ր, փա՜ռք Քեզ:
Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԼԹ
Ապրեցո՛ զիս, Տէ՛ր, ի մարդոյ չարէ. յառնէ անիրաւէ փրկեա՛ զիս:
Խորհեցան զանօրէնութիւն ի սիրտս իւրեանց, զօր ամենայն պատրաստեցան ի պատերազմ:
Սրեցին զլեզուս իւրեանց որպէս զօձի, եւ թոյնք իժից ի ներքոյ շրթանց նոցա:
Պահեա՛ զիս, Տէ՛ր, ի ձեռաց մեղաւորի. եւ ի մարդոյ չարէ փրկեա՛ զիս:
Խորհեցան խափանել զգնացս իմ, թաքուցին ամբարտաւանք որոգայթ ինձ:
Լարս ձգեցին որոգայթ ոտից իմոց, շուրջ զշաւղօք իմովք եդին ինձ զգայթակղութիւն:
Ասացի. «Տէր Աստուած իմ ես Դու. ո՛ւնկն դիր, Տէ՛ր, ձայնի աղօթից իմոց»:
Տէ՛ր, Տէ՛ր, զօրութի՛ւն փրկութեան իմոյ, հովանի՛ գլխոյ իմոյ յաւուր պատերազմի.
Մի՛ մատներ զիս, Տէ՛ր, ի ցանկութիւն մեղաւորաց, ոյք խորհեցան վասն իմ. մի՛ ընդ վայր հարկաներ զիս:
Զի մի՛ երբեք բարձրասցին, եւ խորհուրդք նոցա մի՛ կատարեսցին. վախճան կատարածի նոցա՝ վաստակ շրթանց իւրեանց ծածկեսցէ զնոսա:
Արկցես ի վերայ նոցա կայծակունս հրոյ եւ կործանեսցես զնոսա. ի տառապանաց մի՛ կարասցեն կեալ:
Մարդոյ լեզուանւոյ մի՛ յաջողեսցի ի վերայ երկրի, զայր մեղաւոր չարիք իւր որսասցեն ի կորուստ:
Ծանեայ, զի առնես, Տէ՛ր, դատաստան աղքատի եւ իրաւունս տնանկի:
Արդարք գոհասցին զանուանէ Քումմէ, բնակեսցեն ուղիղք առաջի երեսաց Քոց:

ՍԱՂՄՈՍ ՃԽ
Տէ՛ր, կարդացի առ Քեզ, եւ լո՛ւր ինձ. նայեա՛ ի ձայն աղօթից իմոց ի կարդալ իմում առ Քեզ:
Ուղիղ եղիցին աղօթք իմ որպէս խունկ առաջի Քո, Տէ՛ր, համբարձումն ձեռաց իմոց՝ պատարագ երեկոյի:
Դի՛ր, Տէ՛ր, պահապան բերանոյ իմոյ եւ դուռն ամուր՝ շրթանց իմոց, զի մի՛ խոտորեսցի սիրտ իմ բանիւ չարութեան:
Ի պատճառել զպատճառս մեղաց ընդ մարդս, ոյք գործեն զանօրէնութիւն. եւ ոչ եղէց կցորդ ընտրելոց նոցա:
Խրատեսցէ զիս արդարն ողորմութեամբ եւ յանդիման արասցէ. իւղ մեղաւորի մի՛ օծցէ զգլուխ իմ, եւ աղօթք իմ ի կամս նորա:
Արգելան մերձ առ վիմին դատաւորք նոցա. լուիցեն բանից իմոց եւ քաղցրասցին:
Որպէս թանձրութիւն հողոյ, զի սփռեալ է ի վերայ երկրի, ցրուեսցին ոսկերք նոցա մերձ ի դժոխս:
Առ Քեզ, Տէ՛ր, Տէ՛ր, են աչք իմ. ի Քեզ յուսացայ, Տէ՛ր. մի՛ հաներ զհոգի յինէն:
Պահեա՛ զիս յորոգայթէ, որ թաքուցաւ ինձ, ի գայթակղութենէ գործողին զանօրէնութիւն:
Անկցին ի ցանցս նորա մեղաւորք. միայն եմ ես, մինչեւ անցից:

ՍԱՂՄՈՍ ՃԽԱ
Ձայնիւ իմով ես առ Տէր կարդացի, ձայնիւ իմով զՏէր աղաչեցի:
Սփռեցից առաջի Տեառն զաղօթս իմ եւ զնեղութիւնս իմ առաջի Նորա պատմեցից:
Ի նուաղել յինէն հոգւոյ իմոյ Դու, Տէ՛ր, ծանեար զշաւիղս իմ. ի ճանապարհ, յոր եւ գնայի, թաքուցաւ ինձ որոգայթ:
Հայէի յաջմէ եւ տեսանէի, եւ ոչ ոք էր, որ ճանաչէր զիս. կորեաւ յինէն փախուստ իմ, եւ ոչ գտաւ խնդրող անձին իմոյ:
Աղաղակեցի առ Քեզ, Տէ՛ր, եւ ասացի. «Դու ես յոյս եւ բաժին իմ յերկրին կենդանեաց»:
Նայեա՛, Տէ՛ր, յաղօթս իմ, զի ես խոնարհ եղէ յոյժ. ապրեցո՛ զիս ի հալածչաց իմոց, զի հզօր եղեն քան զիս:
Տէ՛ր, հա՛ն ի բանտէ զանձն իմ. գոհանամ զանուանէ Քումմէ:
Եւ Քեզ սպասեն արդարք, մինչեւ հատուսցես:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

Ալէլուիա, ալէլուիա:

ՄԱՂԹԱՆՔ
Օրհնեալ Տէր, որ բնակեալդ ես ի բարձունս, եւ օրհնեալ են փառք մեծութեան Քո. որ հաստատեցեր զլուսաւորս ի բարձունս, ի յերկնից լոյս ծագեցեր ընդ ամենայն տիեզերս. արարեր զարեգակն լուսատու տուընջեան, զլուսինն եւ զաստեղս՝ լուսատու գիշերոյ, եւ զլոյս ճրագի: Դու ես լոյս գովելի, սուրբ եւ առաջին լոյսն. ի Քէն փախնու խաւարն, եւ զլոյս Քո կենդանի, Տէ՛ր, ծագեա՛ ի սիրտս մեր: Եւ մեք միաբան ասասցուք. օրհնեալ է անուն սուրբ փառաց Քոց. եւ Քեզ երգեմք զօրհնութիւն եւ զփառս Հօր եւ Որդւոյ եւ Հոգւոյդ Սրբոյ այժմ եւ միշտ եւ յաւիտեանս յաւիտենից. ամէն:

ՔԱՐՈԶ
Հասեալքս ի ժամ երեկոյիս ամենեքեան համբառնալով զձեռս մեր՝ փառաւորեմք զՔեզ, Տէր Աստուա՛ծ մեր, որ շնորհեցեր մեզ զտիւս խաղաղութեամբ անցուցանել եւ հասանիլ ի ժամ երեկոյիս: Արժանաւորեա՛ զմեզ, Տէ՛ր, սուրբ սրտիւ, հրեշտակային երգով գոհաբանութիւն մատուցանել Տեառն Աստուծոյ ամենակալիդ. կեցո՛ եւ ողորմեա՛: Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ՄԱՂԹԱՆՔ
Հասեալքս ի ժամ երեկոյիս ամենեքեան անդադար փառաւորեմք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

ՄԵՍԵԴԻ
Քաղցրութիւն արարեր ընդ ծառայի Քում, Տէ՛ր, ըստ բանի Քում:
Քաղցր ես Դու, Տէ՛ր, եւ քաղցրութեամբ Քով խրատեա՛ զիս:

Ուղիղ եղիցին աղօթք իմ
Որպէս խունկ առաջի Քո, Տէ՛ր:
Համբարձումն ձեռաց իմոց՝
Պատարագ երեկոյի:

ՔԱՐՈԶ
Եւ եւս խաղաղութեան զՏէր աղաչեսցուք:
Աղաչեսցուք զամենակալն Աստուած՝ զՀայր Տեառն մերոյ Յիսուսի Քրիստոսի, զԹագաւորն խաղաղութեան, յաղագս խաղաղութեան եւ վասն միայնոյ սուրբ կաթողիկէ եւ առաքելական Եկեղեցւոյ. զի զբազում ամս խաղաղութեամբ տացէ մեզ Տէր Աստուած մեր եւ զթագաւորս խաղաղարարս առաքեսցէ առ մեզ վասն մեծի սուրբ եւ ահաւոր անուան Իւրոյ: Զպետս գաւառաց, զզօրավարս, զզօրագլուխս, զժողովուրդս, զմուտս եւ զելս մեր խաղաղութեամբ պահեսցէ եւ զամենայն պատերազմունս թշնամւոյն խորտակեսցէ ի մէնջ: Տէրն ամենակալ կեցուսցէ եւ ողորմեսցի:
Զերեկս մերձեալ եւ զառաջիկայ գիշերս խաղաղութեամբ անցուցանել հաւատով՝ ի Տեառնէ խնդրեսցուք:
Շնորհեա՛, Տէ՛ր:
Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Շնորհեա՛, Տէ՛ր:
Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Շնորհեա՛, Տէ՛ր:
Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Շնորհեա՛, Տէ՛ր:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Լո՛ւր ձայնից մերոց, Տէր Աստուա՛ծ մեր, ընկա՛լ զաղաչանս մեր, զհամբարձումն ձեռաց մերոց եւ զբանս աղօթից՝ սրբելով զերեկոյի պատարագս մեր ի հոտ անուշից ի հաճոյս Քեզ պատրաստել: Յաւե՛լ ի մեզ, Տէ՛ր ամենակալ, զհաւատ, զյոյս, զսէր եւ զամենայն գործս առաքինութեան, որպէս զի ըստ կամաց Քոց բարեսիրաց, միշտ կրօնաւորեալք բարեպաշտութեամբ ի տուէ եւ ի գիշերի, արժանաւորք եղիցուք յաղագս անձանց մերոց փրկութեան եւ վասն հոգեւոր կենացդ աղաչել զՔեզ, Տէ՛ր, եւ գտանել ի Քէն զշնորհս եւ զողորմութիւն. եւ գոհանալով փառաւորեսցուք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Քեզ երկիր պագանելով, Տէր Աստուա՛ծ մեր, գոհանամք զՔէն յաղագս խաղաղութեամբ անցուցանելոյ ի մէնջ զերկարութիւն տուընջեանս: Տո՛ւր մեզ, Տէ՛ր, աղաչեմք զՔեզ, զերեկս եւ զառաջիկայ գիշերս առանց մեղաց եւ առանց գայթակղութեան անցուցանել. հաստատուն կալ եւ մնալ ի հաւատ, ի յոյս, ի սէր եւ ի պատուիրանապահութեան Քո՝ խնդրելով զխաղաղութիւն ամենայն աշխարհի, եւ Եկեղեցւոյ Քում սրբոյ զհաստատութիւն, եւ անձանց մերոց զփրկութիւն: Որպէս զի ընդունելով ի Քէն զհայցուածս մեր՝ եւ զմեծ վայելչական փառաբանութիւն միշտ ի բարձունս առաքեսցուք ամենազօր տէրութեանդ, Քրիստոս Աստուա՛ծ մեր, այժմ եւ միշտ եւ յաւիտեանս յաւիտենից. ամէն:

ԵՐԵՔՍՐԲԵԱՆ
Սուրբ Աստուա՛ծ, սուրբ եւ հզօր, սուրբ եւ անմահ, որ խաչեցար վասն մեր. ողորմեա՛ մեզ:
(Երիցս կրկնեա՛)

Փառաւորեալ եւ օրհնեալ, միշտ սուրբ Կոյս Աստուածածի՛ն Մարիամ, մա՛յր Քրիստոսի, մատո՛ զաղաչանս մեր Որդւոյ քո եւ Աստուծոյ մերոյ:

ՄԱՂԹԱՆՔ
Փրկել զմեզ ի փորձութենէ եւ յամենայն վտանգից մերոց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն լսելի լինելոյ Տեառն Աստուծոյ ձայնի աղաչանաց մերոց՝ բարեխօսութեամբ սուրբ Աստուածածնին, եւ իջանելոյ ի վերայ մեր ողորմութեան եւ գթութեան Տեառն Աստուծոյ:
Ամենակալ Տէր Աստուա՛ծ մեր, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԻ
Համբարձի զաչս իմ ի լերինս, ուստի եկեսցէ ինձ օգնութիւն:
Օգնութիւն ինձ ի Տեառնէ եկեսցէ, որ արար զերկինս եւ զերկիր:
Մի՛ տար ի սասանութիւն զոտն քո, եւ մի՛ ննջեսցէ պահապան քո,
Որպէս ոչ ննջէ եւ ոչ ի քուն երթայ պահապանն Իսրայելի:
Տէր պահեսցէ զքեզ եւ Տէր ընկալցի աջով ձեռամբ Իւրով:
Արեգակն ի տուէ զքեզ մի՛ մեղիցէ, եւ մի՛ լուսինն՝ ի գիշերի:
Տէր պահեսցէ զքեզ յամենայն չարէ, պահեսցէ Տէր զանձն քո:
Տէր պահեսցէ զմուտ եւ զել քո յայսմ հետէ մինչեւ յաւիտեան:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

«ՀԱՄԲԱՐՁԻ» ՇԱՐԱԿԱՆ

(Հմբ. ապաշխարութեան բկ.)

Յօգնութի՛ւն մեզ ժամանեա, կարո՛ղ Տէր. առաքեա՛ ի բարձանց Քո զխաղաղութիւնդ եւ պահեա՛ զՔո յուսացեալս. ալէլուիա:
Ապաւէ՛ն մեր եւ Փրկի՛չ, հզօ՛ր Թագաւոր, զնշան յաղթութեան խաչի Քո առաքեա՛ առ մեզ եւ պահեա՛ զՔո յուսացեալս. ալէլուիա:
Վերերգեմք Քեզ ի բարձունս ընդ անմարմնոց բազմութիւնսն. զաղաչանս մեր զերեկոյիս ընկա՛լ Քո բարերարութեամբդ եւ պահեա՛ զՔո յուսացեալս. ալէլուիա:

ՔԱՐՈԶ
Վասն խաղաղութեան ամենայն աշխարհի եւ հաստատութեան սրբոյ Եկեղեցւոյ զՏէր աղաչեսցուք: Ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Հա՛յր գթած, բարեխնամող, արարիչ ամենայն արարածոց, ընկա՛լ զպաղատանս ծառայից Քոց ի ժամ երեկոյիս, որ առատդ ես առ ամենեսեան պարգեւօք բարերարութեան Քո: Ողորմեա՛, Տէ՛ր, ամենայն աշխարհի եւ Եկեղեցւոյ Քում սրբոյ, հիւանդաց, վշտացելոց, ճանապարհորդաց, նաւորդաց, խոստովանողաց, ապաշխարողաց եւ հոգւոցն հանգուցելոց: Զի Դու, Տէ՛ր ամենակալ, գիտես զպէտս մեր եւ զկարիս, առաւել քան զոր խնդրեմք եւ իմանամք. եւ Քեզ ընդ Որդւոյ եւ Ամենասրբոյ Հոգւոյդ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

ՆԱԽԱՏՕՆԱԿ

Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՇԱՐԱԿԱՆ

Օրհնութիւն սրբոյն Յովհաննու Մկրտչին. գձ.

(Օրհ. Յովհաննու Մկրտչին գձ.)

Զմարգարէ Բարձրելոյն եւ զԹագաւորին զինաւոր, որ եւ ի ծնունդս կանանց մեծ կոչեցաւ, յօրհնութիւնս հոգեւորս պատուեսցուք:
ԶՄիածնին կարապետ եւ զԲանին զձայն, որ յորովայնէ զՔրիստոս յառաջ գուշակեաց, յօրհնութիւնս հոգեւորս պատուեսցուք:
Զյանապատի բնակիչ եւ շնորհացն քարոզող, որ եւ ի դժոխս զփրկութիւն քարոզեաց, յօրհնութիւնս հոգեւորս պատուեսցուք:

(Օրհ. Յովհաննու Մկրտչին դկ., 1-4 տներ)

Որ յորովայնէ ընտրեցար յԱստուծոյ քարոզող ճշմարիտ Որդւոյն Աստուծոյ, տէ՛ր Յովհաննէս, անդադար բարեխօսեա՛ վասն անձանց մերոց:
Որ յանապատէ կոչեցար ի Տեառնէ՝ մկրտել զբոլորից Բարձողն մեղաց, տէ՛ր Յովհաննէս, անդադար բարեխօսեա՛ վասն անձանց մերոց:
Որ զմարգարէիցն ընկալար զպատիւ եւ զշնորհս ճշմարիտ սուրբ առաքելոցն, տէ՛ր Յովհաննէս, անդադար բարեխօսեա՛ վասն անձանց մերոց:
Որ մոլեգնութեամբն Հերովդիայ ընկալար զվախճան եւ ի դասս հրեշտակաց վերակարգեցար, տէ՛ր Յովհաննէս, անդադար բարեխօսեա՛ վասն անձանց մերոց:

(Ճշւ. Սրբոց հրեշտակապետացն դկ.)

Այսօր ուրախացեալ սուրբ Եկեղեցի Քրիստոսի՝ տօնէ խնդութեամբ զտօն վերինն Երուսաղեմի՝ սրբասաց ձայնիւ փառաւորելով զՔրիստոս:
Այսօր համաձայնեալ որդիք Սիոնի երկրայնոյ՝ տօնիւ զուարճանան որդւոց անդրանկաց վերին Սիոնի՝ սրբասաց ձայնիւ փառաւորելով զՔրիստոս:
Այսօր դասք անմարմնոցն երգս առեալ՝ պարեն ընդ մարդկան, զերգս հոգեւորս յանմահ Փեսային յառագաստ՝ սրբասաց ձայնիւ փառաւորելով զՔրիստոս:

(Մնկ. Սրբոց մարգարէից դկ.)

Այսօր ցնծայ զուարճացեալ Եկեղեցի հեթանոսաց՝ տօնելով զյիշատակ մեծի նահապետին եւ հօրն հաւատոյ Աբրահամու. օրհնեցէ՛ք, մանկո՛ւնք Սիոնի, զՀայրն լուսոյ անլռելի:
Այսօր, նո՛ր Իսրայէլ՝ կոչեցեալ մարգարէիւք առ Աստուած, տօնեա՛ ցնծութեամբ զտօն հովուացն Իսրայելին առաջնոյ՝ գովելով զգլուխ անկեան երկուց որմոց յարմարութեան:
Այսօր ի գլուխս լերանց տուն Աստուծոյ հաստատեալ, որ եւ յաւէտ ոռոգիս յամպոց Հոգւոյն աստուածաբուղխ առատահոս անձրեւօք. բարեբանեա՛ զԱղբիւրն կենաց՝ զԱրբուցանողն ծարաւեաց:

(Տրյ. Սրբոյն Գրիգորի Լուսաւորչին մտանելոյն ի վիրապն դկ.)

Այսօր զիմանալի լուսոյն ծագողն ի խաւարի նստելոցս՝ զԳրիգորիոս սուրբ հայրապետն, եկա՛յք վերապատուեսցուք:
Այսօր զանապական Հոգւոյն պարգեւս բաշխող որդւոց Թորգոմայ, յորդիս լուսոյ նովաւ ծնեա՛լք, եկա՛յք վերապատուեսցուք:
Այսօր զաստուածային բանին պատմող ի Հայաստան աշխարհի, աշակերտեալ նմա մանկո՛ւնք, եկա՛յք վերապատուեսցուք:
Այսօր երգէ Եկեղեցի որդւովք իւրովք ընդ հրեշտակս. «Յիշատակի Լուսաւորչին՝ փա՜ռք ի բարձունս Աստուծոյ»:

(Մնկ. Մանկանցն Բեթղեհեմի դկ. ստղ.)

Երանելի սուրբ մանկունքն, որպէս քաջ նահատակք, ետուն զանձինս իւրեանց ի մահ՝ փոխանակ Որդւոյն Աստուծոյ:
Եւ դիակունք սուրբ մանկանցն, որպէս զծաղիկ նռնենեաց, հարեալ ի կարկտէ եւ անկեալ ի սուրբ Բեթղեհէմ:
Եւ հոգիք սուրբ մանկանցն, որպէս զերամս աղաւնեաց, թռուցեալք ի յերկինս եւ դասեալք ընդ զուարթունս երկնից:

(Ողր. Հոգեգալստեան Դ աւուր դկ.)

Աղբի՛ւր կենաց, Բաշխո՛ղ շնորհաց, Հոգի՛դ՝ իջեալ ի բարձանց, զանապական պարգեւս Քո բաժանեցեր յառաքեալս։
Որ ի վերայ ջուրցն գոլով՝ ստեղծանէիր զարարածս, իջեալ ի ջուրս աւազանին՝ ծնանիս որդիս Աստուծոյ։
Որ զարդարեալ նորոգես միշտ զնոր Քո զԵկեղեցի, պէս պէս շնորհաց Քոց պարգեւօք փայլին մանկունք սորա։

(Հանգստեան դկ.)

Որ ի Հօրէ առաքեցար, մարդասէր կարո՛ղ Փրկիչ, եւ զմեղուցեալ զմարդն բժշկեցեր, ողորմեա՛, Տէ՛ր, հրաժարելոյս, զոր հրաւիրեալ՝ առ Քեզ կոչեցեր։
Որ ի խաչին բեւեռեցար, մարդասէր կարո՛ղ Փրկիչ, եւ զցօղ անապական արեանդ ցօղեցեր տիեզերաց, ողորմեա, Տէ՛ր, հրաժարելոյս, զոր հրաւիրեալ՝ առ Քեզ կոչեցեր։
Որ զդժոխս աւերեցեր եւ զգերեալսն փրկեցեր եւ զարգելեալսն վերածեր ի յոյս կենացն յաւիտենից, ողորմեա, Տէ՛ր, հրաժարելոյս, զոր հրաւիրեալ՝ առ Քեզ կոչեցեր։

(Մեծ. դկ.)

Զքեզ, Աստուածածի՛ն, աղբի՛ւր անսպառ Լուսոյն, որ լուսաւորէ զհաւատացեալս, միաբանական ձայնիւ երգով մեծացուցանեմք:
Դու՝ պարծանք կուսութեան մարդկան, դու՝ ուրախութիւն հրեշտակաց, դու՝ բարձող անիծիցն, վասն որոյ զքեզ, Աստուածածի՛ն, մեծացուցանեմք:
Դու՝ ճշմարիտ արեւելք Արեգականն արդարութեան, յՈրմէ ծագեաց փրկութիւն տիեզերաց, միաբանական ձայնիւ երգով մեծացուցանեմք:

(Ճշւ. Խաչվերացի շաբաթու դկ.)

Սուրբ զխաչ Քո շնորհեցեր զէն Եկեղեցւոյ Քում սրբոյ, որով դատապարտեալ՝ պարտեցաւ թշնամին:
Սովաւ պահպանեա՛ զժողովուրդս Քո, Քրիստո՛ս, որով երկրպագեմք Քեզ ընդ Հօր եւ Հոգւոյն:
Ի Քեզ ապաւինիմք, Քրիստո՛ս, որ գալոցդ ես խաչիւ, որպէս զի փրկեսցես զմեզ յայնմ աւուր ահեղ ատենին:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

(Օրհ. Յովհաննու Մկրտչին դկ., 5-րդ տուն)

Որ մարգարէիցն իջելոց ի դժոխս աւետարանեցեր զգալուստ Որդւոյն Աստուծոյ, տէ՛ր Յովհաննէս, անդադար բարեխօսեա՛ վասն անձանց մերոց:

(Հրց. Յովհաննու Մկրտչին գձ.)

Զուարճանայ այսօր Եկեղեցի Քո, Քրիստո՛ս, ի տօնախմբել զօր յիշատակի կարապետին Քում Յովհաննու. սովաւ զՔեզ միշտ օրհնեմք, Աստուա՛ծ հարցն մերոց:
Որ մեծ ի ծնունդս կանանց ի Քէն վկայեցաւ, ի յորովայնէ յառաջ գուշակեաց զանճառ Քո զմարդեղութիւն. սովաւ զՔեզ միշտ օրհնեմք, Աստուա՛ծ հարցն մերոց:
ՅՈր վեցթեւեան սրովբէքն ոչ իշխէին հայիլ ի փառս Քո, Քրիստո՛ս, սա արժանապէս ձեռնադրեաց զՔեզ ի յորձանսն Յորդանանու. սովաւ զՔեզ միշտ օրհնեմք, Աստուա՛ծ հարցն մերոց:
Գ. ԶՏէ՛ր օրհնեցէք եւ բա՛րձր արարէք զՆա յաւիտեան:
Զկարապետին Յովհաննու կատարելով զյիշատակս՝ անդադար ձայնիւ զԱստուած Հայր օրհնեցէ՛ք եւ բա՛րձր արարէք զՆա յաւիտեան:
Զերանեալ մկրտչին մեծարելով զտօնս՝ հոգեւորական ձայնիւ զՔրիստոս Թագաւորն օրհնեցէ՛ք եւ բա՛րձր արարէք զՆա յաւիտեան:
Յանապատի բարբառոյ ձայն եւ աւետաւոր արքայութեանն. ընդ նմին զճշմարիտ Սուրբ Հոգին օրհնեցէ՛ք եւ բա՛րձր արարէք զՆա յաւիտեան:

(Մեծ. գձ.)

Աստուածածի՛ն, երկնային դո՛ւռն. աստուածային ձայնիւն աւետարանէր հրեշտակն. «Ուրա՛խ լեր, բերկրեա՛լդ, Տէր ընդ քեզ»:
Ի քերովբէս բազմեալ ընդ Հօր՝ անապականաբար բնակիլ հաճեցաւ ի քում յորովայնի. ուրա՛խ լեր, բերկրեա՛լդ, Տէր ընդ քեզ:
Որ բոցեղէն սրովբէիւք շրջափակեալ պահիւր, այսօր ի մէջ մարդկան ի գիրկս հողեղինի յայտնեալ. ուրա՛խ լեր, բերկրեա՛լդ, Տէր ընդ քեզ:

(Ողր. Յովհաննու Մկրտչին գձ.)

Ճրագ Ճշմարտութեան սուրբ Յովհաննէս Մկրտիչ, որ ծագեցաւ ի յերկրի. աղօթիւք սորա, Տէ՛ր, լո՛ւր մեզ եւ ողորմեա՛:
Մարգարէ եւ առաքեալ Աստուածորդւոյդ եւ ձայն բարբառոյ՝ ազդ արարող տիեզերաց. աղօթիւք սորա, Տէ՛ր, լո՛ւր մեզ եւ ողորմեա՛:
Որպէս զարուսեակն ծագեալ ի յերկրի՝ եղեւ կարապետ Արեգականդ արդարութեան. աղօթիւք սորա, Տէ՛ր, լո՛ւր մեզ եւ ողորմեա՛:

(Տրյ. Յովհաննու Մկրտչին գձ.)

Առաքեալն յԱստուծոյ կարապետ՝ մեծն ի մարգարէս մկրտիչն Յովհաննէս, պատրաստէր ճանապարհս Թագաւորին յաւիտենից:
Վկայեաց եւ ասէ. «Չեմ ես Քրիստոսն, այլ առաքեալ եմ առաջի Նորա. եւ հարսին Եկեղեցւոյ Փեսայ Քրիստոս է՝ Արքայն երկնից»:
Տեսանէր զՅիսուս, զի գայր առ նա, աղաղակեաց եւ ասէ. «Ահա Գառն Աստուծոյ, որ եկն ի բառնալ զմեղս աշխարհի»:

ՄԱՂԹԱՆՔ
Քրիստոս Աստուա՛ծ մեր, վասն սուրբ խաչի Քո պատուականի զխաղաղութիւն Քո տո՛ւր մեզ, Տէ՛ր:
Վասն սրբուհւոյ Աստուածածնին եւ Յովհաննու Կարապետին եւ սրբոյն Ստեփանոսի Նախավկային զխաղաղութիւն Քո տո՛ւր մեզ, Տէ՛ր:
Վասն սրբոց Քոց առաքելոց, մարգարէից, վարդապետաց, մարտիրոսաց, հայրապետաց, ճգնաւորաց, կուսանաց, միանձանց եւ երկնային զօրացն զխաղաղութիւն Քո տո՛ւր մեզ, Տէ՛ր:
Եւ վասն նախկին լուսաւորչացն մերոց Թադէոսի եւ Բարթողիմէոսի եւ սրբոց Յակոբեանց՝ երջանիկ առաքելոցն, եւ սրբոյն Գրիգորի մերոյ Լուսաւորչին եւ սրբոցն Յակոբայ Մծբնայ հայրապետին, Մարուգէի ճգնաւորին, Մելիտոսի եպիսկոպոսին եւ Գէորգայ զօրավարին, բարեխօսութեամբ, յիշատակաւ եւ աղօթիւք սրբոցն Յովհաննու Կարապետին եւ Աթանագինեայ եպիսկոպոսին, որոց այսօր է յիշատակ, զխաղաղութիւն եւ զմեծ զողորմութիւն Քո պարգեւեա՛ մեզ, մարդասէ՛ր Տէր:

ՔԱՐՈԶ
Սուրբ ճգնաւորօքն աղաչեսցուք զՏէր, որք զչարսն պարտեցին, նեղութեանցն համբերեցին, լուսեղէն եւ երկնային անթառամ պսակացն արժանի եղեն: Աղօթիւք նոցա եւ բարեխօսութեամբ մեզ ողորմեսցի:
Ամենակալ Տէր Աստուա՛ծ մեր, կեցո՛ եւ ողորմեա՛:

ԱՂՕԹՔ
Որ ընտրեցեր եւ ընկալար զերանելի զվկայսն Քո, Քրիստոս Աստուա՛ծ մեր, եւ հաղորդս արարեր զնոսա կամաւոր չարչարանաց Քոց, արդ, բարեխօս առ Քեզ ունիմք, որք աստ եւ ընդ ամենայն տիեզերս սուրբք իցեն. որպէս զի աղօթիւք նոցա եւ բարեխօսութեամբ խաղաղացուսցես զկենցաղավարութիւնս մեր՝ փրկելով զմեզ յերեւելի եւ յաներեւոյթ թշնամւոյն: Շնորհեա՛ մեզ, Տէ՛ր, ըստ օրինակի նոցա կեալ եւ զվախճանն մեր կնքեա՛ ուղղափառ խոստովանութեամբ ի յոյս կենացն յաւիտենից: Զի եւ մեք արժանի եղիցուք մտանել յերկնային խորանսն լուսոյ եւ ժառանգել զպատրաստեալն ի սկզբանէ աշխարհի սրբոց Քոց զարքայութիւնդ. եւ ընդ նոսին գոհանալով փառաւորեսցուք զՔեզ ընդ Հօր եւ ընդ Սրբոյ Հոգւոյդ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն: