Անցնել բովանդակությանը
Սրբազան ավանդությունՀայ Առաքելական Եկեղեցու հոգևոր ժառանգությունը
🇦🇲 հայերեն
🇦🇲հայերեն 🇷🇺русский 🇬🇧english
Գլխավոր Գրադարան Մուլտիմեդիա Օրացույց Նախագծեր
ԳՐԱԴԱՐԱՆ
  • ԳՐԱԴԱՐԱՆ
  • ՍՈՒՐԲ ԳԻՐՔ
  • ԵԿԵՂԵՑՈՒ ՀԱՅՐԵՐ
  • ԳԻՐՔ ՀԱՐՑՄԱՆՑ
  • ՀԱՆՐԱԳԻՏԱՐԱՆ
  • ՊԱՏՄԱԿԱՆ ԵՐԿԵՐ
  • ԳՐԱՑՈՒՑԱԿ
  • ԹԵՄԱՏԻԿ ՑԱՆԿ
  • ԱՌԱՐԿԱՅԱԿԱՆ ՑԱՆԿ
ԳՐԱԴԱՐԱՆ / ՀԱՆՐԱԳԻՏԱՐԱՆ
A+
ԱԲԳԴԵԶԷԸԹԺԻԼԽԾԿՀՁՂՃՄՅՆՇՈՉՊՋՍՎՏՑՈՒՓՔՕ
  • ԷՄՄԱՆՈՒԵԼ
  • Ս. ԷՋՄԻԱԾՆԻ ՄԱՅՐ ՏԱՃԱՐ
    Ս. ԷՋՄԻԱԾՆԻ ՄԱՅՐ ՏԱՃԱՐ
    id174Հայոց մայր եկեղեցին է: IV դ. պատմիչ Ագաթանգեղոսի վկայությամբ՝ կառուցել է ս. Գրիգոր Լուսավորիչը ս. Տրդատ թագավորի օժանդակությամբ 303 թ.՝ Հայաստանի մայրաքաղաք Վաղարշապատում: Տաճարը կառուցվել է ս. Գրիգորի տեսիլքում ցույց տրված՝ Աստծո Միածին Որդու իջման վայրում (այստեղից՝ «Էջմիածին» անունը):
    Ըստ ազգային ավանդության՝ համաշխարհային ջրհեղեղից հետո Նոյ նախահայրն այստեղ է սեղան կանգնեցրել և գոհության պատարագ մատուցել Աստծուն:
    Տաճարի IV դ. հորինվածքի վերաբերյալ եղել են տարբեր տեսակետներ (օրինակ՝ եռանավ բազիլիկ): 1950-ական թթ. տաճարի պեղումներից բացվեցին ներկայիս մույթերի տակ լուսավորչաշեն կառույցի գմբեթակիր մույթերի խաչաձև խարիսխները, իսկ ավագ խորանի տակ՝ նախնական խորանը: Ենթադրյալ եռանավ բազիլիկի հետքեր բնավ չհայտնաբերվեցին: Հետևաբար, Ս. Էջմիածնի Մայր տաճարն ի սկզբանե եղել է գմբեթավոր՝ առաջին գմբեթավոր եկեղեցին քրիստոնեական ճարտարապետությունում:
    360-ական թթ. պարսից Շապուհ II արքայի՝ Հայաստանում կատարած ավերածություններից Վաղարշապատի մյուս եկեղեցիների հետ մեկտեղ տուժել է նաև Ս. Էջմիածնի Մայր տաճարը: 483-484 թթ. տաճարը հիմնովին վերակառուցել է իշխան Վահան Մամիկոնյանը, որից հետո այն ստացել է հատակագծային և տարածածավալական իր այժմյան տեսքը՝ խաչաձև կենտրոնագմբեթ, քառամույթ, քառախորան հորինվածքով, որը Բյուզանդիայի միջոցով IX-XI դդ. տարածվեց Եվրոպայում և եղավ հայկական եկեղեցական ճարտարապետության մեծ ավանդը ողջ քրիստոնեական ճարտարապետության մեջ:

    Ս. Էջմիածնի Մայր տաճարի ընդհանուր տեսքը հյուսիս-արևմուտքից
    Լուսանկար՝ Սերգեյ Հակոբյանի

    615-628 թթ. Ս. Էջմիածնի Մայր տաճարը նորոգել է Կոմիտաս I կաթողիկոսը: 1627 թ. Մովսես Տաթևացի կաթողիկոսը վերակառուցել է գմբեթը: 1654-1658 թթ. արևմտյան մուտքի առջև Փիլիպոս կաթողիկոսը կառուցել է զանգակատուն (ճարտարապետ՝ Սահակ Հիզանեցի), որը 1664 թ. նկարազարդել է Զաքարե Ոսկերիչը:

    Ս. Էջմիածնի Մայր տաճարի զանգակատան ստորին հարկի որմնանկարը
    Լուսանկար՝ Աշոտ Մովսիսյանի

    1682-ին խորանների տանիքներին փոքրիկ զանգակատներ են կառուցվել: 1712-1721 թթ. տաճարի ներսը որմնանկարել է նշանավոր տաղերգու և նկարիչ Նաղաշ Հովնաթանը:
    1869-ին արևելյան ճակատին կից կառուցվել է թանգարանի շենք: 1955-1965 թթ. Ս. Էջմիածնի Մայր տաճարը նորոգվել է. ամրացվել են գմբեթակիր մույթերը, ծածկի թաղերը, վերականգնվել են որմնանկարները և այլն:
    Ս. Էջմիածնի Մայր տաճարում են պահվում Հայ Եկեղեցու կարևոր սրբությունները, այստեղ է կատարվում Ամենայն հայոց կաթողիկոսի ընտրությունը և օծումը:
  • Ս. ԷՋՄԻԱԾՆԻ ՄԱՅՐԱՎԱՆՔ
  • ԷՋՄԻԱԾՆԻ Ս. ԳԱՅԱՆԵ ԵԿԵՂԵՑԻ
  • ԷՋՄԻԱԾՆԻ Ս. ՀՌԻՓՍԻՄԵ ԵԿԵՂԵՑԻ
  • ԷՋՄԻԱԾՆԻ Ս. ՇՈՂԱԿԱԹ ԵԿԵՂԵՑԻ
  • Ս. ԷՋՄԻԱԾՆԻ ՏՈՆ
sacredtradition.am
Բեռնվում է…