---

Կարգաւորութիւն հասարակաց աղօթից Հայաստանեայց Եկեղեցւոյ,
որ կատարի ի մէջ գիշերի՝ ի դէմս Հօր Աստուծոյ

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Օրհնեալ համագոյ եւ միասնական անբաժանելի Սուրբ Երրորդութիւնն՝ Հայր եւ Որդի եւ Հոգի Սուրբ, այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ Գ
Տէ՛ր, զի՜ բազում եղեն նեղիչք իմ, եւ բազումք յարեան ի վերայ իմ:
Բազումք ասէին զանձնէ իմմէ, թէ՝ «Չիք փրկութիւն սորա առ Աստուած իւր»:
Այլ Դու, Տէ՛ր, օգնական իմ ես, փառք իմ եւ բարձրացուցիչ գլխոյ իմոյ:
Ձայնիւ իմով ես առ Տէր կարդացի, եւ լուաւ ինձ ի լեռնէ սրբոյ Իւրմէ:
Ես ննջեցի եւ ի քուն եղէ, զարթեայ, եւ Տէր ընդունելի իմ է:
Ոչ երկեայց ես ի բիւրաւոր զօրաց նոցա, ոյք շուրջանակի պատեալ պաշարեալ պահէին զիս:
Արի՛, Տէ՛ր, եւ փրկեա՛ զիս, Աստուա՛ծ իմ. զի Դու հարեր զամենեսեան, ոյք էին ընդ իս թշնամութեամբ ի տարապարտուց, եւ զատամունս մեղաւորաց փշրեսցես:
Տեառնդ է փրկութիւն, ի վերայ ժողովրդեան Քո՝ օրհնութիւն Քո:

ՍԱՂՄՈՍ ՁԷ
Տէ՛ր Աստուած փրկութեան իմոյ, ի տուէ կարդացի եւ ի գիշերի առաջի Քո:
Մտցեն աղօթք իմ առաջի Քո, Տէ՛ր, խոնարհեսցի ունկն Քո ի խնդրուածս իմ,
Զի լցաւ չարչարանօք անձն իմ, եւ կեանք իմ ի դժոխս մերձեցան, եւ համարեցայ ես ընդ այնոսիկ, որք իջանեն ի գուբ:
Եղէ ես որպէս մարդ առանց օգնականի եւ ի մեռեալս ազատ:
Որպէս զվիրաւորս, որք ննջեն ի գերեզմանի:
Զորս Դու ոչ յիշեցեր, նոքա ի ձեռանէ Քումմէ մերժեցան:
Եդին զիս ի գբի ներքնումն՝ ի խաւարի եւ ի ստուերս մահու:
Յիս հաստատեցաւ սրտմտութիւն Քո, զամենայն զբօսանս Քո ածեր ի վերայ իմ:
Հեռի արարեր յինէն զծանօթս իմ, եւ եդին զիս նշաւակ իւրեանց:
Մատնեցայ եւ ոչ ելանէի, աչք իմ տկարացան յաղքատութենէ:
Աղաղակեցի առ Տէր զօրհանապազ եւ համբարձի առ Քեզ զձեռս իմ:
Մի՞թէ մեռելոց առնիցես զսքանչելիս Քո, կամ բժիշկք յարուցեալ խոստովան առնիցի՞ն առ Քեզ:
Մի՞թէ պատմեսցէ ոք երբեք ի գերեզմանի զողորմութիւնս Քո կամ զճշմարտութիւնս Քո` ի կորստեան:
Մի՞թէ ճանաչիցին ի խաւարի սքանչելիք Քո, կամ արդարութիւն Քո` յերկիր մոռացեալ:
Ես առ Քեզ, Տէ՛ր, աղաղակեցի. առաւօտու աղօթք իմ ժամանեսցեն առ Քեզ:
Ընդէ՞ր, Տէ՛ր, մերժես զանձն իմ կամ դարձուցանես զերեսս Քո յինէն:
Տնանկ եւ վաստակաւոր եմ ես ի մանկութենէ իմմէ. ի բարձրութենէ խոնարհեցայ եւ ապշեցայ:
Յիս հաստատեցաւ բարկութիւն Քո, արհաւիրք Քո խռովեցուցին զիս,
Շրջեցան զինեւ որպէս ջուր, զօր ամենայն պաշարեցին զիս ի միասին:
Հեռի արարեր յինէն զբարեկամս իմ եւ զծանօթս իմ վասն թշուառութեան իմոյ:

ՍԱՂՄՈՍ ՃԲ
Օրհնեա՛, ա՛նձն իմ, զՏէր, եւ ամենայն ոսկերք իմ՝ զանուն սուրբ Նորա:
Օրհնեա՛, ա՛նձն իմ, զՏէր եւ մի՛ մոռանար զամենայն տուրս Նորա.
Ո քաւէ զմեղս քո, բժշկէ զամենայն հիւանդութիւնս քո.
Ո փրկէ յապականութենէ զկեանս քո, պսակէ զքեզ ողորմութեամբ եւ գթութեամբ.
Ո լնու ի բարութենէ զցանկութիւն քո, նորոգեսցի որպէս արծուոյ մանկութիւն քո:
Առնէ ողորմութիւնս Տէր եւ իրաւունս ամենայն զրկելոց:
Եցոյց Տէր զճանապարհս Իւր Մովսիսի եւ որդւոցն Իսրայելի զկամս Իւր:
Գթած, ողորմած է Տէր, երկայնամիտ եւ բազումողորմ:
Ոչ ի սպառ բարկանայ Տէր եւ ոչ յաւիտեան պահէ ոխս:
Ոչ ըստ մեղաց մերոց արար մեզ եւ ոչ ըստ անօրէնութեան մերում հատոյց մեզ.
Այլ որպէս բարձր են երկինք յերկրէ, այնպէս զօրացոյց Տէր զողորմութիւն Իւր ի վերայ երկիւղածաց Իւրոց:
Որչափ հեռի են արեւելք յարեւմտից, այնչափ հեռի արար ի մէնջ զանօրէնութիւնս մեր:
Որպէս գթայ հայր ի վերայ որդւոց իւրոց, այնպէս գթասցի Տէր յերկիւղածս Իւր.
Զի Նա գիտաց զստեղծուածս մեր եւ յիշեաց, թէ հող եմք:
Մարդոյ որպէս խոտոյ են աւուրք իւր, որպէս ծաղիկ վայրի՝ այնպէս ծաղկէ:
Շնչէ ի նմա հողմ, եւ ոչ է, եւ ոչ եւս երեւի տեղի նորա:
Բայց ողորմութիւն Տեառն յաւիտեանս յաւիտենից ի վերայ երկիւղածաց Իւրոց, եւ արդարութիւն Նորա յորդւոց մինչեւ յորդիս,
Ոյք պահեն զուխտս Նորա, յիշեն զպատուիրանս Նորա եւ առնեն զնա:
Տէր յերկինս պատրաստեաց զաթոռ Իւր, արքայութիւն Նորա ամենեցուն տիրէ:
Օրհնեցէ՛ք զՏէր, ամենայն հրեշտա՛կք Նորա՝ հզօրք զօրութեամբ, ոյք առնէք զբան Նորա ի լսել ձայնի պատգամաց Նորա:
Օրհնեցէ՛ք զՏէր, ամենայն զօրութի՛ւնք Նորա, պաշտօնեա՛յք եւ արարո՛ղք կամաց Նորա:
Օրհնեցէ՛ք զՏէր, ամենայն գո՛րծք Նորա. զի ընդ ամենայն տեղիս է տէրութիւն Նորա. օրհնեա՛, ա՛նձն իմ, զՏէր:

ՍԱՂՄՈՍ ՃԽԲ
Տէ՛ր, լո՛ւր աղօթից իմոց, ո՛ւնկն դիր խնդրուածաց իմոց ճշմարտութեամբ Քով:
Լո՛ւր ինձ արդարութեամբ Քով եւ մի՛ մտաներ ի դատաստան ընդ ծառայի Քում, զի ոչ արդարանայ առաջի Քո ամենայն կենդանի:
Հալածեաց թշնամին զանձն իմ, խոնարհ արար յերկիր զկեանս իմ եւ նստոյց զիս ի խաւարի որպէս մեռեալ յաւիտենից:
Ձանձրացաւ յիս հոգի իմ, եւ սիրտ իմ խռովեցաւ յիս:
Յիշեցի զաւուրսն զառաջինս, խորհեցայ յամենայն գործս Քո. յարարածս ձեռաց Քոց խորհեցայ եւ համբարձի առ Քեզ զձեռս իմ:
Անձն իմ որպէս զերկիր ծարաւի է առ Քեզ. վաղվաղակի լո՛ւր ինձ, Տէ՛ր, զի նուաղեաց յինէն հոգի իմ:
Մի՛ դարձուցաներ զերեսս Քո յինէն. նմանիցեմ այնոցիկ, ոյք իջանեն ի գուբ:
Լսելի՛ արա ինձ առաւօտու զողորմութիւնս Քո, զի ես ի Քեզ, Տէ՛ր, յուսացայ:
Ցո՛յց ինձ ճանապարհ, յոր եւ գնացից, զի առ Քեզ, Տէ՛ր, համբարձի զանձն իմ:
Փրկեա՛ զիս ի թշնամեաց իմոց, Տէ՛ր, զի զՔեզ ապաւէն ինձ արարի:
Ուսո՛ ինձ առնել զկամս Քո, զի Դու ես Աստուած իմ:
Հոգի Քո բարի առաջնորդեսցէ ինձ յերկիր ուղիղ:
Վասն անուան Քո, Տէ՛ր, կեցուսցես զիս, արդարութեամբ Քով հանցես ի նեղութենէ զանձն իմ:
Ողորմութեամբ Քով սատակեա՛ զթշնամիս իմ եւ կորո՛ զամենայն նեղիչս անձին իմոյ, զի ես ծառայ Քո եմ:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ԵՐԳ ԳԻՇԵՐԱՅԻՆ
տեառն Ներսեսի Հայոց կաթողիկոսի

Յիշեսցուք ի գիշերի զանուն Քո, Տէ՛ր:
Բղխեսցեն սիրտք մեր զբան բարի, եւ լեզուք մեր պատմեսցեն զգործս երկնաւոր Թագաւորիդ:
Ի մէջ գիշերի յարուցեալ՝ խոստովանեսցուք զՔեզ, Տէ՛ր:
Զաղօթս մեր տացուք Քեզ, Տէ՛ր, ի գաւիթս Քո ի մէջ նոր Երուսաղեմի:
Ի գիշերի համբարձցուք զձեռս մեր սրբութեամբ առ Քեզ, Տէ՛ր:
Ի ձայն գոհութեան, ամենա՛յն հոգիք, օրհնեցէ՛ք զՏէր:
Փոխ. Զարթի՛ք, փա՛ռք իմ, զարթի՛ք, եւ ես զարթեայց առաւօտուց. ալէլուիա:
Զարթի՛ք ընդ զուարթունս, մանկու՛նք վերինն Սիոնի. ալէլուիա:
Զարթի՛ք, որդի՛ք լուսոյ, ի յօրհնութիւն Հօրն լուսոյ. ալէլուիա:
Զարթի՛ք, փրկեա՛լք արեամբ, եւ տո՛ւք զփառս Փրկողին. ալէլուիա:
Զարթի՛ք, նո՛ր ժողովուրդք՝ նոր երգս առեալ Նորոգողին. ալէլուիա:
Զարթի՛ք, հարսո՛ւնք հոգւով՝ սպասեալք գալոյ սուրբ Փեսային. ալէլուիա:
Զարթի՛ք, վառեա՛լք լուսով, ըստ իմաստուն սուրբ կուսանացն. ալէլուիա:
Զարթի՛ք, պատրաստեցէ՛ք իւղ լապտերաց ջերմ արտասուս. ալէլուիա:
Զարթի՛ք եւ մի՛ ննջէք, նման յիմար կուսից նիրհէք. ալէլուիա:
Զարթի՛ք, երկիր պագցուք եւ արտասուօք զայս ասասցուք. ալէլուիա:
Փոխ. Զարթի՛ր, ընդէ՞ր ննջես, Տէ՛ր, մի՛ մերժեր զմեզ ի սպառ:
Արի՛, Տէ՛ր, օգնեա՛ մեզ. տացուք անուանդ Քում զփառս:
Այժմ եւ յաւէտ Հօր եւ Որդւոյ եւ Սուրբ Հոգւոյն. ամէն:
Փոխ. Զարթուցեալքս ի զբաղմանէ գիշերային հանգստենէ:
Շնորհեսցէ մեզ մարդասէր Տէր մխիթարութիւն եւ ի սփոփանս Եկեղեցւոյ:
Ահիւ եւ դողութեամբ կացցուք ի յաղօթս:
Եկեալ խոստովանեսցուք զյանցանս:
Եւ գտցուք ի Քրիստոսէ զքաւութիւն եւ զմեծ զողորմութիւն:
Կցորդ. Անբաժանելի եւ համագոյ Երրորդութեանդ, համաձայնեալք ընդ զօրս երկնից, փառս մատուցանեմք:
Փա՜ռք Քեզ, որ յանարուեստ յաթոռ բարձրացեալ՝ հանգչիս, սո՛ւրբ Աստուած՝ հզօր եւ սքանչելագործ:
Փա՜ռք Քեզ, որ յանէից գոյացուցեր զամենայն արարածս, սո՛ւրբ Աստուած՝ անճառ Հօր անեղ Որդի:
Փա՜ռք Քեզ, որ տեսչութեամբ խնամես զամենայն արարածս, սո՛ւրբ Աստուած՝ Բղխումն անսպառ աղբեր:
Տէ՛ր, ժողովրդապետք Եկեղեցւոյ ի Քէն հայցեն՝ ասելով. «Հովի՛ւ բարի, ողորմեա՛ բանաւոր հօտի»:

Ամէն. ալէլուիա, ալէլուիա, ալէլուիա:
Ամէն. ալէլուիա, ալէլուիա, ալէլուիա:

ՔԱՐՈԶ
Զարթուցեալքս ամենեքեան ի հանգստենէ քնոյ, զոր շնորհեաց մեզ մարդասէրն Աստուած ի մխիթարութիւն եւ ի սփոփանս տկարութեան մերում, եւ եկեալքս միաբան հոգեւոր երգով ի փառաբանութիւն եւ ի պատիւ ամենասուրբ անուան Տեառն մերոյ եւ Փրկչին Յիսուսի Քրիստոսի՝ ահիւ եւ դողութեամբ կացցուք յաղօթս առաջի Նորա: Եւ գոհացարուք զՆմանէ ի գիշերային ժամուս յայսմիկ վասն իրաւանց եւ արդարութեան Նորա. որ ընտրեաց զմեզ ողորմութեամբն Իւրով եւ շնորհեաց մեզ բերել զնմանութիւն երկնային հրեշտակացն ի փառաբանիչս Տեառն Աստուծոյ ամենեցուն եւ մեզ լինիլ: Եւ մեք, այսուհետեւ սրբելով զանձինս մեր ի խղճէ եւ ի չար գործոց, համբարձցուք զձեռս մեր ի սրբութիւն առանց բարկութեան եւ երկմտութեան: Հաւատով խնդրեսցուք ի Նմանէ զքաւութիւն եւ զթողութիւն յանցանաց մերոց՝ խոստովան լինելով զգաղտնիս սրտից մերոց ծածկագիտին Աստուծոյ: Որպէս զի ընդունելով զպաղատանս մեր աղօթիւք եւ բարեխօսութեամբ ամենայն սրբոց՝ շնորհեսցէ մեզ մարդասէրն Աստուած կեալ առաքինութեամբ եւ անարատ վարուք ըստ կամաց Նորա յայսմ աշխարհիս եւ արժանաւոր լինելով յաւիտենական եւ երկնային խորանացն, զոր խոստացաւ սիրելեաց Իւրոց ճշմարիտն Աստուած Յիսուս Քրիստոս: Տէ՛ր մեր, կեցո՛ եւ ողորմեա՛:
Կեցո՛, Տէ՛ր:
Զմնացուած գիշերիս խաղաղութեամբ անցուցանել՝ հաւատով ի Տեառնէ խնդրեսցուք:
Շնորհեա՛, Տէ՛ր:
Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Շնորհեա՛, Տէ՛ր:
Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Շնորհեա՛, Տէ՛ր:
Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Շնորհեա՛, Տէ՛ր:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ՈՂԲԵՐԳՈՒԹԻՒՆ ԱՆՁԻՆ ԶՂՋԱՑԵԼՈՅ
տեառն Ներսեսի Հայոց կաթողիկոսի

Աշխա՛րհ ամենայն, առ իս նայեցեալ՝ ախտակի՛ց լերուք:
Բանամ զշրթունս, բարբառիմ լեզուաւս, բողոքեմ զանձնէս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Գող եղէ մեղաց, գտող կորստեան, գուբ ինձ փորեցի:
Դաւեցի զանձն իմ, դաւաճանեցի, դարան գործեցի.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Երբեմն էի լոյս. եւ այժմ եմ խաւար եւ ստուեր մահու:
Զիա՞րդ պատմեցից զթիւ մեղաց իմոց, զի բազում են յոյժ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Էրկի՛նք եւ երկի՛ր, էկայք ողբացէ՛ք էղկելի զանձն իմ:
Ընտրեցի զչարն, ընկալայ կամաւ ըզհոյլս մեղաց.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Թաթաւիմ տղմով, թաւալիմ ի մեղս. թօթափիլ չկարեմ:
Ժանտ ախտիւ լցեալ՝ ժահահոտ եղէ ժամանակս բազումս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ի բաց մեկնեցայ ի սուրբ խորհրդոց, ի բարեաց գործոց:
Լաւ վարկաւ անձն իմ լուսոյն հեռանալ, լինել ընդ խաւար.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Խորհուրդք չարին խաբեն զհոգիս, խորասոյզ առնեն:
Ծածկեն անդնդօք, ծիծաղին գլորմամբս, ծանակ զիս առնեն.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Կամաւ կորացայ կարկամեալ անձամբս. կանգնիլ ոչ կարեմ:
Հուր մեղաց կիզող հրդեհեաց որ յիս հոգեւոր բարիս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ձաղկեցայ մեղօք, ձաղեցին տեսողք, ձանձրացաւ հոգիս:
Ղեղի դառնութեան, ղօղեալ ի սիրտ իմ, ղամբար իմ շիջաւ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ճաշակմամբ մեղաց ճաշեցի զմահ, ճոխս աղքատացայ:
Մեռեալ եմ հոգւովս, մոլորեալ՝ մտօքս, միայն կամ մարմնովս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Յորոգայթ մահու յորսողին անկայ, յաղթեցայ յախտից:
Նետից թշնամւոյն նշաւակ եղէ. նոր միշտ խոցոտիմ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Շուրջ պատեալ զինեւ շունք բազումք եղեն. շաղախին արեամբս:
Որս եղէ չարին. ուռկանաւ մեղաց որսացաւ զանձն իմ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Չարաչար վշտօք չարչարի անձն իմ. չունիմ դադարումն:
Պարտապան գտայ պարտուց յանցանաց պարտեալս ի մեղաց.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ջանամ զղջանալ, ջեռանիմ դարձեալ, ջեռնում հրով մեղաց:
Ռաբբի կոչեցայ, ռակայ անուանիմ ռամկական վարուքս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Սիրով ցանկութեան սաստիկ բարկութեան սիրտ իմ խոցեալ է:
Վիրօք յանցանաց վշտանայ հոգիս. վարանեալ շրջիմ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Տիրեցին ինձ չարք. տարագիր հանին տիրական գրկացն:
Րաբունւոյն բարւոյ րախճական ձայնին րոտինս ոչ լուայ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ցանկութիւն չարեաց ցանկալի դիմօք ցաւեցոյց զաչս իմ:
Ււրաքանչիւրոց ւիւսմամբ խուռն ախտից ւիւծեալ է հոգիս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Փութացի՛ր, ա՛նձն իմ, փախչիլ ի չարեաց, փափագիլ բարեաց:
Քեզ միշտ մե՛րձ ծանիր քուն մահու եկեալ քննող Դատաւոր.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Սրբուհւոյ Աստուածածնին բարեխօսութեամբ յիշեա՛, Տէ՛ր, եւ ողորմեա՛:


ԱՂՕԹՔ
ԶՔէն գոհանամք, Տէր Աստուա՛ծ մեր, որ շնորհեցեր մեզ հանգիստ քնոյ խաղաղութեամբ: Եւ զարթուցեալ ժամանեցուցեր զմեզ կանխել յերկրպագութիւն ահաւոր եւ փառաւորեալ անուանդ Քում սրբոյ: Տո՛ւր մեզ, Տէ՛ր, աղաչեմք զՔեզ, զմնացուած գիշերիս խաղաղութեամբ անցուցանել. եւ զամենայն ժամանակս կենաց պանդխտութեան մերոյ երկիւղիւդ Քո ամրացո՛ եւ պահեա՛: Որպէս զի զգուշութեամբ եւ անարատ վարուք կրօնաւորեալք յայսմ աշխարհիս՝ ժամանեսցուք յանքոյթ եւ ի խաղաղ նաւահանգիստ յաւիտենական ի կեանսդ՝ շնորհօք եւ մարդասիրութեամբ Տեառն մերոյ եւ Փրկչին Յիսուսի Քրիստոսի: Ընդ Որում Քեզ Հօր եւ Հոգւոյդ Սրբոյ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Նայեա՛ց, Տէ՛ր բարերար, ողորմութեամբ Քով յերկրպագուս եւ ի փառաբանիչս անուանդ Քում սրբոյ: Տէ՛ր զօրութեանց, խաղաղացո՛ զանձինս մեր յամենայն սատանայական խռովութեանց եւ յաշխարհական զբօսանաց: Զհրեշտակ խաղաղութեան Քո առաքեա՛ առ մեզ, որ եկեալ պահեսցէ զմեզ անխռովս ի տուէ եւ ի գիշերի, յարթնութեան եւ ի հանգստեան մերում: Որպէս զի բարեպաշտութեամբ եւ արժանաւորապէս Քեզ Տեառնդ ծառայելով ի կեանս յայսոսիկ՝ ժամանեսցուք յաւիտենական երկնից արքայութեան Քո, զոր պատրաստեցեր ի սկզբանէ աշխարհի սրբոց Քոց: Եւ ընդ նոսին գոհանալով փառաւորեսցուք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից:

Օրհնեալ Տէր մեր Յիսուս Քրիստոս. ամէն:
Ալէլուիա, ալէլուիա:

ԿԱՆՈՆ «Մի նախանձիր», ԱԿ (սաղմոս ԼԶ-ԾԴ)
Թո՛յլ տուք մանկտւոյդ գալ առ Իս եւ մի՛ արգելուք զդոսա, զի այդպիսեաց է արքայութիւնն երկնից:

ԿԱՆՈՆԱԳԼՈՒԽ

ՍԱՂՄՈՍ ԺԳ
Ասաց անզգամն ի սրտի իւրում, թէ՝ «Ոչ գոյ Աստուած». ալէլուիա. Ապականեցան եւ պղծեցան յանօրէնութեան իւրեանց, եւ ոչ ոք է, որ առնէ զքաղցրութիւն. աէլուիա:
Աստուած յերկնից նայեցաւ յամենայն որդիս մարդկան՝ տեսանել, թէ իցէ՞ ոք իմաստուն, որ խնդրիցէ զԱստուած:
Ամենեքեան խոտորեցան ի միասին եւ անպիտանացան:
Ոչ ոք է, որ առնէ զբարի, եւ չէ ոք մինչեւ ի մի:
Ո՞րպէս ոչ ծանիցեն ամենեքեան, ոյք գործեն զանօրէնութիւն,
Ոյք ուտէին զժողովուրդ իմ որպէս կերակուր հացի եւ առ Աստուած ոչ կարդացին:

ՍԱՂՄՈՍ ԾԴ
Փոխ. Զի ոչ գոյր նոցա փոխանակ, եւ ոչ երկեան յԱստուծոյ. ալէլուիա, ալէլուիա.
Ձգեաց զձեռն Իւր ի հատուցանել նոցա, եւ նոքա պղծեցին զօրէնս Նորա:
Բաժանեցան ի սրտմտութենէ երեսաց Նորա. եւ եհաս ի սիրտս նոցա:
Կակուղ էին բանք նոցա քան զձէթ, եւ ինքեանք՝ որպէս սլաք:
Ընկեա՛ ի Տէր զհոգս քո, եւ Նա կերակրէ զքեզ եւ ոչ տայ յաւիտեան սասանութիւն արդարոյ:
Դու, Աստուա՛ծ, իջուսցես զնոսա ի գուբ ապականութեան. արք արիւնահեղք եւ նենգաւորք մի՛ հասարակեսցեն զաւուրս իւրեանց, այլ ես ի Քեզ, Տէ՛ր, յուսացայ:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Ալէլուիա, ալէլուիա:

ՇԱՐԱԿԱՆ ԱՊԱՇԽԱՐՈՒԹԵԱՆ

Օրհնութիւն ապաշխարութեան ակ.

(Ողր. ապաշխարութեան ակ. Ա.)

Ծով կենցաղոյս հանապազ զիս ալեկոծէ:
Մրրկեալ ալիք թշնամին ինձ յարուցանէ:
Նաւապե՛տ բարի, լե՛ր անձին իմոյ ապաւէն:

(Ողր. ապաշխարութեան ակ. Բ.)

Մերձ եմ յընկղմիլ. օգնեա՛ ինձ, Նաւապե՛տ բարի, քանզի ծանրացան ի վերայ իմ բեռինք մեղաց:
Աստուա՛ծ, յօգնել ինձ փութա՛, քանզի խորք չարեաց ընկղմեն զիս յանդունդս. այլ Դու նաւապե՛տ լեր եւ ինձ ձեռնտու:
Փրկեա՛ ի վտանգէ զնաւաբեկս ի յալեաց ծովէ, քանզի կորնչիմ ի մեղաց անօրէնութեան իմոյ:

(Ողր. ապաշխարութեան ակ. Գ.)

Աղաչեմ զՔեզ, Տէ՛ր, պարգեւեա՛ ինձ ապաշխարութեամբ լուանալ զմեղս իմ եւ ողորմեա՛:
Զարտասուս իմ եւ զհառաչանս սրտի իմոյ մարդասիրութեամբդ Քո ընկա՛լ, Տէ՛ր, եւ ողորմեա՛:
Մերձեսցին խնդրուածք իմ առաջի Քո, Տէ՛ր. բարերարութեամբդ Քո խնայեա՛ յիս եւ ողորմեա՛:

(Ողր. ապաշխարութեան ակ. Դ.)

Աղաչեմ զՔեզ, Հա՛յր երկնաւոր, մի՛ դարձուցաներ զերեսս Քո յինէն, զի նեղեալ եմ ես. վաղվաղակի լո՛ւր ինձ, Տէ՛ր:
Մոլորեալ անձն իմ անօրէնութեամբ. մի՛ կորուսաներ զիս, Տէ՛ր, ըստ անօրէնութեան իմոյ, որ խնդրողդ ես մոլորեալ ոչխարիս:
Ծանրացեալ մեղօք ընկղմի անձն իմ. ընկա՛լ զիս որպէս երբեմն զՊետրոս, որ ծփիմս ալեկոծեալ յանցանօք:

(Ողր. ապաշխարութեան ակ. Ե.)

Մեղայ, Տէ՛ր, բազումողո՛րմ Աստուած. մեղայ, ողորմեա՛:
Մեղայ, Տէ՛ր, եւ անկանիմ առաջի Քո. մեղայ, ողորմեա՛:
Մեղայ, Տէ՛ր, խոստովանիմ զյանցանս իմ. մեղայ, ողորմեա՛:

(Ողր. ապաշխարութեան ակ. Զ.)

Թիւնս իմ. Մեղայ Քեզ, Տէ՛ր, քաւեա՛ զիս:
Մեղաք, անօրինեցաք ամենեքեան, ոչ պահեցաք զպատուիրանս Քո. մեղայ Քեզ, Տէ՛ր, քաւեա՛ զիս:
Դարձի՛ր, Տէ՛ր, ի բարկութենէ Քումմէ, անցո՛ ի մէնջ զցասումն Քո. մեղայ Քեզ, Տէ՛ր, քաւեա՛ զիս:

(Մեծ. Մեծի պահոց Բ կիւրակէի ակ., 2-րդ տուն)

Որ զԲանն անեղական՝ զԷակն էից գոյացութեանց, անճառաբար ծնար՝ մարմին եղեալ ի փրկութիւն եղականացս, առ Նա միշտ բարեխօսեա՛ վասն անձանց մերոց:

Փա՜ռք Հօր եւ Որդւոյ եւ Հոգւոյն Սրբոյ:

(Մեծ. Մեծի պահոց Բ կիւրակէի ակ., 3-րդ տուն)

Որ զՊտուղն ի քէն կենաց ընծայեցեր մեռեալն Ադամայ, զՈրոյ պահօք քառասնօրեայ քաւեաց զպտղոյն ճաշակումն եւ յանվախճան զնոյն վերածեաց ի կեանս, առ Նա միշտ բարեխօսեա՛ վասն անձանց մերոց:

Այժմ եւ միշտ եւ յաւիտեանս յաւիտենից. ամէն:

(Օրհ. Վարագայ խաչին ակ. Ա., 3-րդ տուն)

Ի միւսանգամ Քո գալստեանն՝ յերեւիլ սուրբ նշանիս, արժանի՛ արա զծառայս Քո վերստին նորոգման, զի Դու միայն ես Թագաւոր փառաց՝ օրհնեալ յաւիտեան:

ՍԱՂՄՈՍ ԻԹ
Բարձր առնեմ զքեզ, Տէ՛ր, զի ընկալար զիս եւ ոչ ուրախ արարեր զթշնամին իմ յիս:
Տէ՛ր Աստուած իմ, կարդացի առ Քեզ, եւ բժշկեցեր զիս. Տէ՛ր, հաներ ի դժոխոց զանձն իմ, փրկեցեր զիս յայնցանէ, որք իջանեն ի գուբ:
Սաղմո՛ս ասացէք Տեառն, սո՛ւրբք Նորա եւ խոստովա՛ն եղերուք յիշատակի սրբութեան Նորա:
Սրտմտութիւն է ի բարկութեան Նորա, եւ կեանք են ի կամաց Նորա:
Ընդ երեկոյս հանգիցեն լալիք, առաւօտու եղիցի ուրախութիւն:
Ես ասացի ի բարեկենդանութեան իմում, թէ՝ ոչ սասանեցայց յաւիտեան:
Տէ՛ր, ի կամս Քո ետուր գեղոյ իմոյ զօրութիւն, դարձուցեր զերեսս Քո յինէն, եւ ես եղէ խռովեալ:
Առ Քեզ, Տէ՛ր, կարդացի եւ առ Աստուած իմ աղաղակեցի. զի՞նչ օգուտ է Քեզ յարենէ իմմէ, թէ իջանեմ ես յապականութիւն:
Մի՞թէ հող խոստովան առնիցի առ Քեզ կամ պատմեսցէ զճշմարտութիւնս Քո:
Լուաւ ինձ Տէր եւ ողորմեցաւ եւ Տէր եղեւ ինձ օգնական:
Դարձոյց զսուգ իմ յուրախութիւն, զերծ յինէն զքուրձ եւ ինձ զգեցոյց զուրախութիւն:
Որպէս սաղմոս ասասցեն Քեզ փառք իմ, եւ այլ մի՛ եւս զղջացայց. Տէ՛ր Աստուած իմ, յաւիտեան խոստովան եղէց Քեզ:

ԱՒԵՏԱՐԱՆ ՀԱՆԳՍՏԵԱՆ
(ԱԿ, ԳԿ)

Սրբոյ Աւետարանիս Յիսուսի Քրիստոսի, որ ըստ Ղուկասու
(գլ. 12.32-48)

Տէրն մեր Յիսուս Քրիստոս ասէ.

«Մի՛ երկնչիր, հօ՛տ փոքրիկ, զի հաճեցաւ Հայր ձեր տալ ձեզ զարքայութիւն:
Վաճառեցէ՛ք զինչս ձեր եւ տո՛ւք ողորմութիւն. եւ արարէ՛ք ձեզ քսակս առանց հնանալոյ, գանձ անպակաս յերկինս, ուր ո՛չ գող մերձենայ, եւ ո՛չ ցեց ապականէ:
Զի ուր գանձն ձեր է, անդ եւ սիրտք ձեր եղիցին:
Եղիցին գօտիք ձեր պնդեալ ընդ մէջս, եւ ճրագունք՝ լուցեալք, եւ դուք՝ նմանողք մարդկան, որ ակն ունիցին տեառն իւրեանց, թէ երբ դառնայցէ ի հարսանեաց, զի յորժամ գայցէ եւ բախիցէ, վաղվաղակի բանայցեն նմա:
Երանի իցէ ծառայիցն այնոցիկ, զորս եկեալ տէրն գտցէ արթունս. ամէն ասեմ ձեզ, զի գօտի ընդ մէջ ածցէ եւ բազմեցուսցէ զնոսա եւ անցեալ պաշտիցէ զնոսա. եւ եթէ յերկրորդ կամ յերրորդ պահու եկեսցէ եւ գտցէ այնպէս, երանելի են ծառայքն այնոքիկ:
Բայց զայն գիտասջիք. եթէ գիտէր տանուտէրն, յորում ժամու գող գայ, հսկէր եւ չտայր թոյլ ական հատանել ի տան իւրում:
Եւ դո՛ւք եղերուք պատրաստք, զի յորում ժամու ոչ կարծիցէք, գայ Որդի մարդոյ»:
Ասէ Պետրոս. «Տէր, առ մե՞զ ասացեր զառակդ զայդ, թէ՞ առ ամենեսեան»:
Եւ ասէ Տէր. «Ո՞վ իցէ հաւատարիմ տնտես եւ իմաստուն, զոր կացոյց տէր իւր ի վերայ գերդաստանի իւրոյ՝ տալ ի ժամու զկերակուրս:
Երանի իցէ ծառային այնմիկ, զոր եկեալ տէր իւր՝ գտանիցէ արարեալ այնպէս:
Արդարեւ ասեմ ձեզ, զի ի վերայ ամենայն ընչից իւրոց կացուսցէ զնա:
Ապա եթէ ասիցէ ծառայն այն ի սրտի իւրում՝ «Յամէ տէր իմ ի գալ», եւ սկսանիցի հարկանել զծառայսն եւ զաղախնայսն, ուտել եւ ըմպել եւ արբենալ, եկեսցէ տէր ծառային այնորիկ յաւուր, յորում ակն ոչ ունիցի, եւ ի ժամու, յորում ոչ գիտիցէ, ընդ մէջ կտրեսցէ զնա եւ զմասն նորա ընդ անհաւատս դիցէ:
Եւ ծառայ, որ գիտիցէ զկամս տեառն իւրոյ եւ ոչ պատրաստիցէ ըստ կամաց նորա, արբցէ գան բազում:
Եւ որ ոչն գիտիցէ եւ արժանի գանի ինչ գործիցէ, արբցէ գան սակաւ. ամենայնի, որում շատ տուաւ, շատ խնդրեսցի ի նմանէ, եւ որում բազում աւանդեցաւ, առաւել եւս պահանջեսցեն ի նմանէ»:

ՄԱՂԹԱՆՔ
Հոգւոցն հանգուցելոց, Քրիստո՛ս Աստուած, արա՛ հանգիստ եւ ողորմութիւն. եւ մեզ՝ մեղաւորացս, շնորհեա՛ զթողութիւն յանցանաց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն հանգուցեալ հոգւոցն աղաչեսցուք զՓրկիչն մեր Քրիստոս, զի զնոսա ընդ արդարսն դասեսցէ եւ զմեզ կեցուսցէ շնորհիւ ողորմութեան Իւրոյ:
Ամենակալ Տէր Աստուա՛ծ մեր, կեցո՛ եւ ողորմեա՛:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Քրիստոս Որդի՛ Աստուծոյ, անոխակա՛լ եւ բարեգո՛ւթ, գթա՛ Քո արարչական սիրովդ ի հոգիս հանգուցեալ ծառայից Քոց: Յիշեա՛ յաւուր մեծի գալստեան արքայութեան Քո: Արա՛ արժանի ողորմութեան, քաւութեան եւ թողութեան մեղաց: Դասաւորեալ պայծառացո՛ ընդ սուրբս Քո յաջակողմեան դասուն, զի Դու ես Տէր եւ Արարիչ ամենեցուն, Դատաւոր կենդանեաց եւ մեռելոց. եւ Քեզ վայելէ փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

ՄԱՂԹԱՆՔ
Քրիստոս Աստուա՛ծ մեր, անճառելի տէրութեանդ շնորհիւ եւ բարեխօսութեամբ օրհնաբանեալ անարատ ծնողիդ՝ սրբուհւոյ Աստուածածնին եւ միշտ Կուսին, լուսաւորեալ պայծառացո՛ զհոգիս համօրէն հաւատացելոց, յուսով ի Քեզ ննջեցելոց, եւ այնոցիկ, որք ընդ հովանեաւ սրբոյ տաճարիս են հանգուցեալ:

ՇԱՐԱԿԱՆ ՕՐՀՆՈՒԹԵԱՆ

Օրհնութիւն սրբոյն Գրիգորի Լուսաւորչին սոսկալի չարչարանացն եւ մտին ի վիրապն գկ.

(Օրհ. Սրբոյն Գրիգորի Լուսաւորչին մտանելոյն ի վիրապն գկ., 1-34 տներ)

Այսօր զուարճացեալ ցնծայ Եկեղեցի՝ դրախտ աստուածատունկ ծաղկեալ, յորմէ տուաւ մեզ տունկն անմահութեան տէր Գրիգորիոս եւ պտղովն իւրով ելից զտիեզերս ամենայն:
Բարունա՛կ ողկուզաբեր ճշմարիտ որթոյն՝ մշակեալ հայրական աստուածային աջովն, յորմէ բղխեաց բաժակն ուրախարար տրտմեցելոյ ազինս, որով արբեալ՝ զմայլեցաք յուրախութիւն հոգեւոր:
Գարնանաբեր հնչո՛ւմն հարաւային հողմոյն՝ ճառագայթեալ հրով աստուածային Հոգւոյն, որով հալեցաւ սառն կռապաշտութեան հիւսիսաբնակ ազանց, եւ եղեն ծաղկեալք աստուածային գիտութեամբն:
Դրա՛խտ նորազուարճ՝ տնկեալ յաշխարհիս Հայոց բազմաջան քրտամբք, տէ՛ր Գրիգորիոս, արբեալ ի վտակաց հոսման քարոզի ճշմարիտ բանին, ծաղկաւէտ լցեալ հրաշագեղ տնկօք:
Երկնային լոյս ծագեալ ի յերկրի ցուցար՝ պայծառացեալ փայլմամբ ի յԱրփւոյն կենաց, որով հերքեցաւ խաւար թանձրամած Հայաստանեայց ազգի, եւ տեսին զլոյս շնորհաց Սուրբ Հոգւոյն:
Զօրաց հրեղինաց անմարմնական դասուց պարակցեալ՝ ցնծան ընդ հողանիւթ բնութեանս, որ ընծայեաց Տեառն Աստուծոյ զտէր Գրիգորիոս, որով նուիրին ի փառս ուղղափառ հաւատոյ մանկունք:
Էական Բարւոյն կերպարա՛ն բարեաց, հովուապետ բարի տէ՛ր Գրիգորիոս, քաղցրաձայն հնչմամբ դարձուցի՛չ մոլորեալ հօտին՝ ժողովեալ ի հօտ ճշմարիտ Հովուին:
Ընտրեալ յԱստուծոյ քահանայապե՛տ անբիծ, քարոզո՛ղ ճշմարիտ Աստուծոյ բանին, ընծայեցեր Տեառն Աստուծոյ նոր ժողովուրդ մաքրեալ՝ հրաւիրեալ ի փառս վերնոյն Սիոնի:
Թագ պարծանաց Արշակունեաց կազմեալ. առաքելական վարուք, տէ՛ր Գրիգորիոս, յօրինեցար բազմագոյն ակամբք հանդիսից նահատակութեան վայելուչ պսակ հիւսեալ սուրբ Եկեղեցւոյ:
Ժառանգորդ եղեր հայրենի սեպհական հօտին՝ վիճակեալ Թադէոսի սուրբ առաքելոյն. պարգեւական զաւակ կենդանի նշխարաց նորին, շառաւիղ շնորհաց՝ աղօթիւք հայցեալ:
Ի փշաբեր արմատոյ վա՛րդ կարմրերփեան ծաղկեալ, առաքելաշնորհ տէ՛ր Գրիգորիոս, անուշահոտ բուրմամբ լցեր զՀայաստան աշխարհս՝ յայտնելով ի մեզ զհոտ գիտութեան:
Լուսապայծառ ծաղիկ ի յերկրի ցուցար, բժիշկ հոգւոց մերոց տէ՛ր Գրիգորիոս, քաղցրաճաշակ արմաւենի՛ ի տանն Աստուծոյ տնկեալ՝ պարարտացեալ պտղով հաւատոյ մանկամբք:
Խոստովանո՛ղ Քրիստոսի, ճշմարի՛տ վկայ, բազմաչարչար նահատակ տէ՛ր Գրիգորիոս, զպակասութիւն չարչարանաց Տեառն ի մարմնի քում կրեցեր, որով ցնծայ Եկեղեցի ի փառս որդւոց Սիոնի:
Ծնո՛ղ հոգեւոր աստուածանման սիրով, գորովագութ հայր պարծանաց տէ՛ր Գրիգորիոս, չարչարանօք մարմնոյդ մաքրեցեր զմեզ ի յաղտոյ մեղաց եւ ծնար որդիս լուսափայլ բանիւդ:
Կերպարա՛ն փառաց Միածնի Որդւոյն, մարտիրոս յաղթող տէ՛ր Գրիգորիոս, բեւեռս երկաթիս ընկալան երկնագնաց թաթք ոտից քոց սուրբ, զի բեւեռեսցես զմեզ յերկիւղն Աստուծոյ:
Հայաստանեայց հա՛յր հաւատոյ, հեղինակ ընտրեալ ճգնողական վարուք տէ՛ր Գրիգորիոս, ի կոճեղս ոլորեալ հոսեալ յարենէ սրունք սրբասնեալ մարմնոյդ՝ հաստատելով զմեզ ի վէմ հաւատոյ:
Ձայնիւ մաղթանօք զյիշատակս քո տօնեմք, լուսաւորիչ հոգւոց մերոց հա՛յր Գրիգորիոս. կապիճս երկաթիս ծանունս եւ դառնակսկիծս կախաղանաւ ընկալեալ՝ գետնամածեալ ծնրադրութեամբ ծունկք մարմնոյ քո սուրբ:
Ղեկօք հաւատոյ ընդ ծով աշխարհիս անցեր, վշտակիր մարմնով տէ՛ր Գրիգորիոս. տանջեալ ջարդեցան աստուածակիր բարձք անդամոց քոց սուրբ, զի զլուծեալ անդամք հոգւոցս հաստատեսցես վերստին:
Ճշմարիտ Հոգւոյն հանճարով լցեալ, աղբերաբար շնորհիւ տէ՛ր Գրիգորիոս, ստորագլուխ եղեր ջրաչարչար պարպատմամբ եւ ուռուցմամբ ճգնեալ, զի լուասցես զմեզ ի յաղտոյ մեղաց:
Մաքրողական աղ համեմիչ Հայաստանեայց եղեր, արիաբար հսկող հա՛յր Գրիգորիոս. աստուածային օրինացն բեռնաբարձ ողամբ կրեցեր զծանրութիւն աղին, որով բարձեր ի մէնջ զբեռինս մեղաց:
Յեռեալ ընդ ոսկւոյ ակամբք պատուական մարգարտաշար հիւսեմք զչարչարանաց քոց թիւ, տէ՛ր Գրիգորիոս. գելարանօք, անուօք եւ առասանօք չարահնար տանջեալ, դանդանաւանդս եւ գելս աստուածաբան բերանոյդ:
Նահատա՛կ բարի Քրիստոսի ընտրեալ, Արքային զինուոր տէ՛ր Գրիգորիոս, ստորագլուխ կախմամբ դառնահոտ շնչմանն արիաբար տարար, զի ուղղեսցես զգնացս ոտից մեր յերկինս:
Շառաւի՛ղ լուսազարդ ճանապարհին կենաց, երկրին աւետեաց հետեւող տէ՛ր Գրիգորիոս, մոխրաշունչ եղեր՝ քացախ ընկալեալ հոգիաշունչ ռնգամբք՝ պարգեւելով ուրախութեան մեզ օծումն:
Ոսկիաձոյլ գերագոյն պատուական գլխոյն, համանմանեալ հոգւով հա՛յր Գրիգորիոս, կռփեալ հարուածովք՝ եդեալ ի մամուլս աստուածազարդ գլուխ քո, որով բարձրացան գլուխք՝ կորացեալ մեղօք:
Չնաշխարհիկ պարծա՛նք հողեղէն բնութեանս, չարչարանօք ժուժկալեալ տէ՛ր Գրիգորիոս, տատասկաւ տանջեալ, քերանօք քերեալ եւ կապարաւ հալեալ՝ խանձողեցան նշխարք քո սուրբ ոսկերացդ:
Պարակի՛ց հոգեղինաց երկնային զօրացն, սրբափայլ զգեստիւք տէ՛ր Գրիգորիոս, ի խոր վիրապին իջեր ի տղմին ի մէջ դառնաշունչ օձիցն, զի փրկեսցես զմեզ ի չար վիշապէն:
Ջերմեռանդն աղօթիւք եւ հոգեւոր սիրով, վաստակեալ յուսով տէ՛ր Գրիգորիոս, զանկեալքս ի յերկնից ի խորս անդնդոց, զվիրաւորեալքս մեղօք վերաբերեա՛ ընդ քեզ յերկնային խորանսն:
Ռետին քաղցրութեան մեզ ի վերուստ շնորհեալ, երիւք հնգօք ամօք ի վիրապին ճգնեալ, աստուածային տեսլեամբն ելեալ՝ բժշկէր զհարուածեալսն ի դիւական ախտիցն. եւ լուսափայլ բանիւ բղխմամբ հաստատեցեր ի հաւատս:
Սոսկալի տեսլեանն ի վերուստ յայտնեալ՝ մարգարէահրաշ հոգւով տեսանող եղեր բացման խորանին վերնական յարկին եւ երկնային լուսոյն՝ խառնելով մարդկան ընդ հրաբուն զօրացն:
Վարդագոյն արեամբ վկայիցն Տեառն մաքրեցաւ երկիրս ի յաղտոյ մեղաց, որ եւ հիմնեցեր խորան խորհրդոյ տաճար տէրունի շինեալ, յորմէ բղխեաց աղբիւր քաւութեան մերոյ:
Տանն Աստուծոյ տեսանո՛ղ բարի, արժանացեալ շնորհիւ տէ՛ր Գրիգորիոս, կործանի՛չ բագնեաց, քակտի՛չ մեհենաց զօրութեամբ խաչին, քահանայապե՛տ ընտրեալ աստուածային յայտնութեամբն:
Րաբունւոյն հրամանաւն ի վերուստ կոչեալ յառաքելական յաթոռ տէ՛ր Գրիգորիոս, յորդառատ բանիւ հոգեւոր ծննդեամբ լուսաւորեցեր զՀայաստան աշխարհս՝ ընդ ամենայն տեղիս շինեալ խորան փառացն Աստուծոյ:
Ցանկալի՛ սրովբէից անմարմնական վարուք, մաքրափայլ մարմնով տէ՛ր Գրիգորիոս, յանապատի բնակեցար հանգոյն Յովհաննու եւ Եղիայի ճգնեալ, օրէնսդի՛ր աստուածային պատգամաց՝ նման մեծին Մովսեսի:
Ւիւծելոցս մեղօք տառապեալ որդեացս, աստուածագութ ծնող հա՛յր Գրիգորիոս, հայցմամբ աղօթիւք առ Հայրն երկնաւոր խնդրեա՛ կատարել զընթացս մեր ուղղափառութեամբ:

(Ճշւ. Մեծ. գկ.)

Ամենագովելի եւ քան զերկինս բարձրագո՛յն, որ զանհասանելի զՏէրն յորովայնի քում կրեցեր եւ ցնծութիւն աշխարհի ծնար, վասն որոյ ամենեքեան զքեզ միշտ մեծացուցանեմք:
Ամենապայծառ բերկրեալ միշտ Կո՛յս, որ զանբաւելի զԲանն անճառաբար յղացար եւ զմարմնացեալն Աստուած ծնանելով ի քէն. վասն որոյ ամենեքեան զքեզ միշտ մեծացուցանեմք:
Ի լեռնէ վէմն առանց ձեռին հատեալ Դանիէլ գուշակեաց զանսերմն զծնունդ քո , հա՛րսն երկնաւոր, մայր եւ յետ ծննդեան մնալով Կոյս. վասն որոյ ամենեքեան զքեզ միշտ մեծացուցանեմք:

(Ճշւ. Խաչվերացի գկ. Տէր թգ.)

Յաղթող եւ զնոր օրհնութիւն միշտ ի բաձունս երգեսցուք Թագաւորին Քրիստոսի, հաւատացեա՛լ ժողովուրդք:
Որ եկն ի լուսաւորել զընտրեալ սուրբ զԵկեղեցի եւ պսակեաց սուրբ խաչիւն, Նմա զփառս երգեսցուք:
Այսօր եւ մեք տօնեսցուք զնաւակատիս սուրբ խաչին եւ Փրկողին մատուսցուք փառք եւ պատիւ յաւիտեան:

Փա՜ռք Հօր եւ Որդւոյ եւ Հոգւոյն Սրբոյ:

(Օրհ. Սրբոյն Գրիգորի Լուսաւորչին մտանելոյն ի վիրապն գկ., 35-րդ տուն)

Փրկաւէտ մահուան կենարար Բանին կենդանի վկայ տէ՛ր Գրիգորիոս, առ Ծնեալն ի Հօրէ Որդին Միածին լոյսն ճշմարիտ հայցեա՛՝ լուսաւորել զանձինս մեր աստուածային գիտութեամբն:

Այժմ եւ միշտ եւ յաւիտեանս յաւիտենից. ամէն:

(Օրհ. Սրբոյն Գրիգորի Լուսաւորչին մտանելոյն ի վիրապն գկ., 36-րդ տուն)

Քնա՛ր քաղցրախօս աստուածային Հոգւոյն՝ յօրինեալ մարմնով եւ մասամբք հոգւոյդ, առ Բղխեալն ի Հօրէ՝ փառակից Որդւոյ Սուրբ Հոգին մաղթեա՛, զի մաքրեսցէ զմեզ մեղաց մերոց:

ՄԱՂԹԱՆՔ
Բարեխօսութեամբ սրբուհւոյ Աստուածածնին եւ Յովհաննու Մկրտչին, սրբոյն Ստեփանոսի Նախավկային եւ սրբոյն Գրիգորի մերոյ Լուսաւորչին, եւ վասն խաչի Քո պատուականի, Տէ՛ր, ընկա՛լ զաղաչանս մեր եւ կեցո՛ զմեզ:

ՔԱՐՈԶ
(ԱԿ, ԳԿ)
Վասն ուղղելոյ զգնացս մեր ի ճանապարհս խաղաղութեան զՏէր աղաչեսցուք:
Տէ՛ր, ողորմեա՛:
Վասն ցրելոյ ի մէնջ զամենայն խորհուրդս չարին զՏէր աղաչեսցուք:
Տէ՛ր, ողորմեա՛:
Վասն պարգեւելոյ մեզ առողջ խորհուրդս եւ առաքինի վարս զՏէր աղաչեսցուք:
Տէ՛ր, ողորմեա՛:
Վասն պահելոյ զմեզ ընդ հովանեաւ ամենազօր աջոյն Իւրոյ զՏէր աղաչեսցուք:
Տէ՛ր, ողորմեա՛:
Վասն խորտակելոյ զհակառակորդն վաղվաղակի ընդ ոտիւք մերովք զՏէր աղաչեսցուք:
Տէ՛ր, ողորմեա՛:
Վասն հոգւոցն հանգուցելոց, որք ճշմարիտ եւ ուղիղ հաւատով ի Քրիստոս ննջեցին, զՏէր աղաչեսցուք:
Յիշեա՛, Տէ՛ր, եւ ողորմեա՛:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
(ԱԿ, ԳԿ)
Տէ՛ր երկնի եւ երկրի, Արարի՛չ ամենայն արարածոց՝ երեւելեաց եւ աներեւութից, առ Քեզ կարդամք յամենայն ժամ, զի ընդ ամենայն տեղիս է տէրութիւն Քո, եւ արքայութիւն Քո ամենեցուն տիրէ: Շնորհեա՛ մեզ երկիւղիւ ի պաշտօն Քո կանխել հանապազ, սիրել զՔեզ ի բոլոր սրտէ եւ ի բովանդակ մտաց եւ յամենայն զօրութենէ մերմէ պահել զպատուիրանս Քո, համբառնալ առ Քեզ զձեռս մեր ի սրբութիւն՝ առանց բարկութեան եւ երկմտութեան, եւ գտանել ի Քէն զշնորհս եւ զողորմութիւն եւ զառաքինասէր գործոցն յաջողութիւն: Վասն զի Դու ես Տէր կենաց եւ Աստուած ողորմութեանց, եւ Քեզ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Քում ամենազօր եւ յաղթող տէրութեանդ կրկնի ամենայն ծունր յերկրպագութիւն, եւ փառաւորի յամենեցունց թագաւորութիւն Քո: Նայեա՛ յերկրպագութիւնս մեր եւ ուսո՛ մեզ առնել զարդարութիւն ճշմարտութեան: Վասն զի Դու ես Աստուած խաղաղութեան, որ բարձեր զթշնամութիւն ի միջոյ եւ արարեր զխաղաղութիւն յերկինս եւ յերկրի, հեռաւորաց եւ մերձաւորաց աւետարանեցեր զնոր պարգեւս Քոյին բարեացդ. որում եւ զմեզ մեծի շնորհացդ արժանաւորս արասցես՝ դասելով ընդ ճշմարիտ երկրպագուս Քո, Աստուա՛ծ մեր եւ Տէ՛ր մեր եւ Փրկիչ Յիսուս Քրիստո՛ս, որ ես օրհնեալ ընդ Հօր եւ ընդ Սուրբ Հոգւոյդ այժմ եւ միշտ եւ յաւիտեանս յաւիտենից. ամէն:

ՄԱՂԹԱՆՔ
(ԱԿ, ԳԿ)
Յերգս օրհնութեան եւ ի ձայն սաղմոսաց անդադար փառաւորեմք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

սրբոյն Գրիգորի Լուսաւորչին մերոյ մի՛ կորուսաներ զմեզ: Երրորդութի՛ւն Սուրբ, ողորմեա՛ մեզ:
Սաղմոս. Փրկութիւն արդարոց ի Տեառնէ է. վերակացու է նոցա ի ժամանակս նեղութեան: Օգնեսցէ նոցա Տէր եւ փրկեսցէ զնոսա, ապրեցուսցէ ի մեղաւորաց եւ կեցուսցէ զնոսա, զի յուսացան ի Նա. եւ բարեխօսութեամբ սրբոյն Գրիգորի Լուսաւորչին մերոյ մի՛ կորուսաներ զմեզ: Երրորդութի՛ւն Սուրբ, ողորմեա՛ մեզ:
Փոխ. Որք զտանջանս եւ զմահ վասն Քո յանձն առին եւ հեղին զարիւնս իւրեանց վասն անուանդ Քո սրբոյ, բարեխօսութեամբ սոցա մի՛ կորուսաներ զմեզ: Երրորդութի՛ւն Սուրբ, ողորմեա՛ մեզ:

Այսօր դասք հրեշտակաց ուրախանան ընդ ճգնութիւն սրբոյն Գրիգորի Լուսաւորչին մերոյ:
Քանզի գոչէ Եկեղեցի Քո, Քրիստո՛ս, զյաղթանակ՝ մարտ հեղման արեան սորա ի վերայ մեծի անուան Քո, Տէ՛ր:
Բազում համարձակութիւն է սորա առաջի Աստուծոյ ի ձեռն հեղման սուրբ արեան իւրոյ:
Քանզի յօժարութեամբ մատնեաց զանձն իւր չարաչար եւ դառն տանջանաց վասն մեծի անուանն Տեառն:
Քանզի արհամարհելով անարգեաց զանցաւոր զկեանս աշխարհիս եւ փափագեաց յաւիտենական կենացն. եւ միշտ եւ հանապազ ուրախանայ ընդ Տեառն իւրոյ յանսպառ յուրախութիւնսն:
Փա՜ռք Հօրն էականի, Որդւոյն Միածնի եւ ազատիչ Սուրբ Հոգւոյն վայել է փառք, պատիւ եւ իշխանութիւն այժմ եւ միշտ եւ յաւիտեանս յաւիտենից. ամէն:
Եւ յորժամ շարժին երկինք եւ երկիր ի յահէ փառաց բանին Տեառն Աստուծոյ, յայնժամ նստուցանէ ընդ աջմէ Իւրմէ զսիրելիս անուան Իւրոյ՝ ի լուսեղէն խորանսն զուգաւորելով:

Թագաւոր յաւիտեան:
Զողորմութիւն Քո, Տէ՛ր, արա՛ ի մեզ եւ բարեխօսութեամբ

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն: