---

Կարգաւորութիւն հասարակաց աղօթից Հայաստանեայց Եկեղեցւոյ,
որ կատարի ի մէջ գիշերի՝ ի դէմս Հօր Աստուծոյ

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Օրհնեալ համագոյ եւ միասնական անբաժանելի Սուրբ Երրորդութիւնն՝ Հայր եւ Որդի եւ Հոգի Սուրբ, այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ Գ
Տէ՛ր, զի՜ բազում եղեն նեղիչք իմ, եւ բազումք յարեան ի վերայ իմ:
Բազումք ասէին զանձնէ իմմէ, թէ՝ «Չիք փրկութիւն սորա առ Աստուած իւր»:
Այլ Դու, Տէ՛ր, օգնական իմ ես, փառք իմ եւ բարձրացուցիչ գլխոյ իմոյ:
Ձայնիւ իմով ես առ Տէր կարդացի, եւ լուաւ ինձ ի լեռնէ սրբոյ Իւրմէ:
Ես ննջեցի եւ ի քուն եղէ, զարթեայ, եւ Տէր ընդունելի իմ է:
Ոչ երկեայց ես ի բիւրաւոր զօրաց նոցա, ոյք շուրջանակի պատեալ պաշարեալ պահէին զիս:
Արի՛, Տէ՛ր, եւ փրկեա՛ զիս, Աստուա՛ծ իմ. զի Դու հարեր զամենեսեան, ոյք էին ընդ իս թշնամութեամբ ի տարապարտուց, եւ զատամունս մեղաւորաց փշրեսցես:
Տեառնդ է փրկութիւն, ի վերայ ժողովրդեան Քո՝ օրհնութիւն Քո:

ՍԱՂՄՈՍ ՁԷ
Տէ՛ր Աստուած փրկութեան իմոյ, ի տուէ կարդացի եւ ի գիշերի առաջի Քո:
Մտցեն աղօթք իմ առաջի Քո, Տէ՛ր, խոնարհեսցի ունկն Քո ի խնդրուածս իմ,
Զի լցաւ չարչարանօք անձն իմ, եւ կեանք իմ ի դժոխս մերձեցան, եւ համարեցայ ես ընդ այնոսիկ, որք իջանեն ի գուբ:
Եղէ ես որպէս մարդ առանց օգնականի եւ ի մեռեալս ազատ:
Որպէս զվիրաւորս, որք ննջեն ի գերեզմանի:
Զորս Դու ոչ յիշեցեր, նոքա ի ձեռանէ Քումմէ մերժեցան:
Եդին զիս ի գբի ներքնումն՝ ի խաւարի եւ ի ստուերս մահու:
Յիս հաստատեցաւ սրտմտութիւն Քո, զամենայն զբօսանս Քո ածեր ի վերայ իմ:
Հեռի արարեր յինէն զծանօթս իմ, եւ եդին զիս նշաւակ իւրեանց:
Մատնեցայ եւ ոչ ելանէի, աչք իմ տկարացան յաղքատութենէ:
Աղաղակեցի առ Տէր զօրհանապազ եւ համբարձի առ Քեզ զձեռս իմ:
Մի՞թէ մեռելոց առնիցես զսքանչելիս Քո, կամ բժիշկք յարուցեալ խոստովան առնիցի՞ն առ Քեզ:
Մի՞թէ պատմեսցէ ոք երբեք ի գերեզմանի զողորմութիւնս Քո կամ զճշմարտութիւնս Քո` ի կորստեան:
Մի՞թէ ճանաչիցին ի խաւարի սքանչելիք Քո, կամ արդարութիւն Քո` յերկիր մոռացեալ:
Ես առ Քեզ, Տէ՛ր, աղաղակեցի. առաւօտու աղօթք իմ ժամանեսցեն առ Քեզ:
Ընդէ՞ր, Տէ՛ր, մերժես զանձն իմ կամ դարձուցանես զերեսս Քո յինէն:
Տնանկ եւ վաստակաւոր եմ ես ի մանկութենէ իմմէ. ի բարձրութենէ խոնարհեցայ եւ ապշեցայ:
Յիս հաստատեցաւ բարկութիւն Քո, արհաւիրք Քո խռովեցուցին զիս,
Շրջեցան զինեւ որպէս ջուր, զօր ամենայն պաշարեցին զիս ի միասին:
Հեռի արարեր յինէն զբարեկամս իմ եւ զծանօթս իմ վասն թշուառութեան իմոյ:

ՍԱՂՄՈՍ ՃԲ
Օրհնեա՛, ա՛նձն իմ, զՏէր, եւ ամենայն ոսկերք իմ՝ զանուն սուրբ Նորա:
Օրհնեա՛, ա՛նձն իմ, զՏէր եւ մի՛ մոռանար զամենայն տուրս Նորա.
Ո քաւէ զմեղս քո, բժշկէ զամենայն հիւանդութիւնս քո.
Ո փրկէ յապականութենէ զկեանս քո, պսակէ զքեզ ողորմութեամբ եւ գթութեամբ.
Ո լնու ի բարութենէ զցանկութիւն քո, նորոգեսցի որպէս արծուոյ մանկութիւն քո:
Առնէ ողորմութիւնս Տէր եւ իրաւունս ամենայն զրկելոց:
Եցոյց Տէր զճանապարհս Իւր Մովսիսի եւ որդւոցն Իսրայելի զկամս Իւր:
Գթած, ողորմած է Տէր, երկայնամիտ եւ բազումողորմ:
Ոչ ի սպառ բարկանայ Տէր եւ ոչ յաւիտեան պահէ ոխս:
Ոչ ըստ մեղաց մերոց արար մեզ եւ ոչ ըստ անօրէնութեան մերում հատոյց մեզ.
Այլ որպէս բարձր են երկինք յերկրէ, այնպէս զօրացոյց Տէր զողորմութիւն Իւր ի վերայ երկիւղածաց Իւրոց:
Որչափ հեռի են արեւելք յարեւմտից, այնչափ հեռի արար ի մէնջ զանօրէնութիւնս մեր:
Որպէս գթայ հայր ի վերայ որդւոց իւրոց, այնպէս գթասցի Տէր յերկիւղածս Իւր.
Զի Նա գիտաց զստեղծուածս մեր եւ յիշեաց, թէ հող եմք:
Մարդոյ որպէս խոտոյ են աւուրք իւր, որպէս ծաղիկ վայրի՝ այնպէս ծաղկէ:
Շնչէ ի նմա հողմ, եւ ոչ է, եւ ոչ եւս երեւի տեղի նորա:
Բայց ողորմութիւն Տեառն յաւիտեանս յաւիտենից ի վերայ երկիւղածաց Իւրոց, եւ արդարութիւն Նորա յորդւոց մինչեւ յորդիս,
Ոյք պահեն զուխտս Նորա, յիշեն զպատուիրանս Նորա եւ առնեն զնա:
Տէր յերկինս պատրաստեաց զաթոռ Իւր, արքայութիւն Նորա ամենեցուն տիրէ:
Օրհնեցէ՛ք զՏէր, ամենայն հրեշտա՛կք Նորա՝ հզօրք զօրութեամբ, ոյք առնէք զբան Նորա ի լսել ձայնի պատգամաց Նորա:
Օրհնեցէ՛ք զՏէր, ամենայն զօրութի՛ւնք Նորա, պաշտօնեա՛յք եւ արարո՛ղք կամաց Նորա:
Օրհնեցէ՛ք զՏէր, ամենայն գո՛րծք Նորա. զի ընդ ամենայն տեղիս է տէրութիւն Նորա. օրհնեա՛, ա՛նձն իմ, զՏէր:

ՍԱՂՄՈՍ ՃԽԲ
Տէ՛ր, լո՛ւր աղօթից իմոց, ո՛ւնկն դիր խնդրուածաց իմոց ճշմարտութեամբ Քով:
Լո՛ւր ինձ արդարութեամբ Քով եւ մի՛ մտաներ ի դատաստան ընդ ծառայի Քում, զի ոչ արդարանայ առաջի Քո ամենայն կենդանի:
Հալածեաց թշնամին զանձն իմ, խոնարհ արար յերկիր զկեանս իմ եւ նստոյց զիս ի խաւարի որպէս մեռեալ յաւիտենից:
Ձանձրացաւ յիս հոգի իմ, եւ սիրտ իմ խռովեցաւ յիս:
Յիշեցի զաւուրսն զառաջինս, խորհեցայ յամենայն գործս Քո. յարարածս ձեռաց Քոց խորհեցայ եւ համբարձի առ Քեզ զձեռս իմ:
Անձն իմ որպէս զերկիր ծարաւի է առ Քեզ. վաղվաղակի լո՛ւր ինձ, Տէ՛ր, զի նուաղեաց յինէն հոգի իմ:
Մի՛ դարձուցաներ զերեսս Քո յինէն. նմանիցեմ այնոցիկ, ոյք իջանեն ի գուբ:
Լսելի՛ արա ինձ առաւօտու զողորմութիւնս Քո, զի ես ի Քեզ, Տէ՛ր, յուսացայ:
Ցո՛յց ինձ ճանապարհ, յոր եւ գնացից, զի առ Քեզ, Տէ՛ր, համբարձի զանձն իմ:
Փրկեա՛ զիս ի թշնամեաց իմոց, Տէ՛ր, զի զՔեզ ապաւէն ինձ արարի:
Ուսո՛ ինձ առնել զկամս Քո, զի Դու ես Աստուած իմ:
Հոգի Քո բարի առաջնորդեսցէ ինձ յերկիր ուղիղ:
Վասն անուան Քո, Տէ՛ր, կեցուսցես զիս, արդարութեամբ Քով հանցես ի նեղութենէ զանձն իմ:
Ողորմութեամբ Քով սատակեա՛ զթշնամիս իմ եւ կորո՛ զամենայն նեղիչս անձին իմոյ, զի ես ծառայ Քո եմ:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ԵՐԳ ԳԻՇԵՐԱՅԻՆ
տեառն Ներսեսի Հայոց կաթողիկոսի

Յիշեսցուք ի գիշերի զանուն Քո, Տէ՛ր:
Բղխեսցեն սիրտք մեր զբան բարի, եւ լեզուք մեր պատմեսցեն զգործս երկնաւոր Թագաւորիդ:
Ի մէջ գիշերի յարուցեալ՝ խոստովանեսցուք զՔեզ, Տէ՛ր:
Զաղօթս մեր տացուք Քեզ, Տէ՛ր, ի գաւիթս Քո ի մէջ նոր Երուսաղեմի:
Ի գիշերի համբարձցուք զձեռս մեր սրբութեամբ առ Քեզ, Տէ՛ր:
Ի ձայն գոհութեան, ամենա՛յն հոգիք, օրհնեցէ՛ք զՏէր:
Փոխ. Զարթի՛ք, փա՛ռք իմ, զարթի՛ք, եւ ես զարթեայց առաւօտուց. ալէլուիա:
Զարթի՛ք ընդ զուարթունս, մանկու՛նք վերինն Սիոնի. ալէլուիա:
Զարթի՛ք, որդի՛ք լուսոյ, ի յօրհնութիւն Հօրն լուսոյ. ալէլուիա:
Զարթի՛ք, փրկեա՛լք արեամբ, եւ տո՛ւք զփառս Փրկողին. ալէլուիա:
Զարթի՛ք, նո՛ր ժողովուրդք՝ նոր երգս առեալ Նորոգողին. ալէլուիա:
Զարթի՛ք, հարսո՛ւնք հոգւով՝ սպասեալք գալոյ սուրբ Փեսային. ալէլուիա:
Զարթի՛ք, վառեա՛լք լուսով, ըստ իմաստուն սուրբ կուսանացն. ալէլուիա:
Զարթի՛ք, պատրաստեցէ՛ք իւղ լապտերաց ջերմ արտասուս. ալէլուիա:
Զարթի՛ք եւ մի՛ ննջէք, նման յիմար կուսից նիրհէք. ալէլուիա:
Զարթի՛ք, երկիր պագցուք եւ արտասուօք զայս ասասցուք. ալէլուիա:
Փոխ. Զարթի՛ր, ընդէ՞ր ննջես, Տէ՛ր, մի՛ մերժեր զմեզ ի սպառ:
Արի՛, Տէ՛ր, օգնեա՛ մեզ. տացուք անուանդ Քում զփառս:
Այժմ եւ յաւէտ Հօր եւ Որդւոյ եւ Սուրբ Հոգւոյն. ամէն:
Փոխ. Զարթուցեալքս ի զբաղմանէ գիշերային հանգստենէ:
Շնորհեսցէ մեզ մարդասէր Տէր մխիթարութիւն եւ ի սփոփանս Եկեղեցւոյ:
Ահիւ եւ դողութեամբ կացցուք ի յաղօթս:
Եկեալ խոստովանեսցուք զյանցանս:
Եւ գտցուք ի Քրիստոսէ զքաւութիւն եւ զմեծ զողորմութիւն:
Կցորդ. Անբաժանելի եւ համագոյ Երրորդութեանդ, համաձայնեալք ընդ զօրս երկնից, փառս մատուցանեմք:
Փա՜ռք Քեզ, որ յանարուեստ յաթոռ բարձրացեալ՝ հանգչիս, սո՛ւրբ Աստուած՝ հզօր եւ սքանչելագործ:
Փա՜ռք Քեզ, որ յանէից գոյացուցեր զամենայն արարածս, սո՛ւրբ Աստուած՝ անճառ Հօր անեղ Որդի:
Փա՜ռք Քեզ, որ տեսչութեամբ խնամես զամենայն արարածս, սո՛ւրբ Աստուած՝ Բղխումն անսպառ աղբեր:
Տէ՛ր, ժողովրդապետք Եկեղեցւոյ ի Քէն հայցեն՝ ասելով. «Հովի՛ւ բարի, ողորմեա՛ բանաւոր հօտի»:

Ամէն. ալէլուիա, ալէլուիա, ալէլուիա:
Ամէն. ալէլուիա, ալէլուիա, ալէլուիա:

ՔԱՐՈԶ
Զարթուցեալքս ամենեքեան ի հանգստենէ քնոյ, զոր շնորհեաց մեզ մարդասէրն Աստուած ի մխիթարութիւն եւ ի սփոփանս տկարութեան մերում, եւ եկեալքս միաբան հոգեւոր երգով ի փառաբանութիւն եւ ի պատիւ ամենասուրբ անուան Տեառն մերոյ եւ Փրկչին Յիսուսի Քրիստոսի՝ ահիւ եւ դողութեամբ կացցուք յաղօթս առաջի Նորա: Եւ գոհացարուք զՆմանէ ի գիշերային ժամուս յայսմիկ վասն իրաւանց եւ արդարութեան Նորա. որ ընտրեաց զմեզ ողորմութեամբն Իւրով եւ շնորհեաց մեզ բերել զնմանութիւն երկնային հրեշտակացն ի փառաբանիչս Տեառն Աստուծոյ ամենեցուն եւ մեզ լինիլ: Եւ մեք, այսուհետեւ սրբելով զանձինս մեր ի խղճէ եւ ի չար գործոց, համբարձցուք զձեռս մեր ի սրբութիւն առանց բարկութեան եւ երկմտութեան: Հաւատով խնդրեսցուք ի Նմանէ զքաւութիւն եւ զթողութիւն յանցանաց մերոց՝ խոստովան լինելով զգաղտնիս սրտից մերոց ծածկագիտին Աստուծոյ: Որպէս զի ընդունելով զպաղատանս մեր աղօթիւք եւ բարեխօսութեամբ ամենայն սրբոց՝ շնորհեսցէ մեզ մարդասէրն Աստուած կեալ առաքինութեամբ եւ անարատ վարուք ըստ կամաց Նորա յայսմ աշխարհիս եւ արժանաւոր լինելով յաւիտենական եւ երկնային խորանացն, զոր խոստացաւ սիրելեաց Իւրոց ճշմարիտն Աստուած Յիսուս Քրիստոս: Տէ՛ր մեր, կեցո՛ եւ ողորմեա՛:
Կեցո՛, Տէ՛ր:
Զմնացուած գիշերիս խաղաղութեամբ անցուցանել՝ հաւատով ի Տեառնէ խնդրեսցուք:
Շնորհեա՛, Տէ՛ր:
Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Շնորհեա՛, Տէ՛ր:
Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Շնորհեա՛, Տէ՛ր:
Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Շնորհեա՛, Տէ՛ր:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԵՐԳ ԱՂՕԹԱԿԱՆ
տեառն Ներսեսի Հայոց կաթողիկոսի

Առաւօ՛տ լուսոյ, Արեգա՛կն արդար, առ իս լո՛յս ծագեա:
Բղխո՛ւմն ի Հօրէ, բղխեա՛ ի հոգւոյս բան Քեզ ի հաճոյս:
Գա՛նձդ ողորմութեան, գանձիդ ծածկելոյ գտո՛ղ զիս արա:
Դուռն ողորմութեան դաւանողիս բա՛ց, դասեցո՛ վերնոցն:
Երրեա՛կ միութիւն, եղելո՛ց խնամող, եւ ի՛նձ ողորմեա:
Զարթիր, Տէ՛ր, յօգնել. զարթո՛ զթմրեալս՝ զուարթնոց նմանիլ:
Էդ Հայր անսկիզբն, էակից Որդի, է միշտ Սուրբ Հոգի:
Ընկա՛լ զիս, գթա՛ծ, ընկա՛լ, ողորմա՛ծ, ընկա՛լ, մարդասէ՛ր:
Թագաւո՛ր փառաց, թողութեա՛նց տուող, թո՛ղ ինձ զյանցանս:
Ժողովո՛ղ բարեաց, ժողովեա՛ եւ զիս ժողովս անդրանկաց:
Ի Քէն, Տէ՛ր, հայցեմ, ի մարդասիրէդ, ինձ բժշկութիւն:
Լե՛ր կեանք մեռելոյս, լոյս՝ խաւարելոյս, լուծանող՝ ցաւոյս:
Խորհրդո՛ց գիտող, խաւարիս շնորհեա՛ խորհուրդ լուսաւոր:
Ծնո՛ւնդ Հօր ծոցոյ, ծածկելոյս ստուերաւ ծագեա՛ լոյս փառաց:
Կենարա՛ր Փրկիչ, կեցո՛ զմեռեալս, կանգնեա՛ զգլորեալս:
Հաստեա՛ հաւատով, հաստատեա՛ յուսով, հիմնեցո՛ սիրով:
Ձայնիւս աղաչեմ, ձեռօքս պաղատիմ. ձիր բարեաց շնորհեա՛:
Ղամբարամբ լուսոյ, ղեկավա՛ր ճարտար, ղօղեալս ամրացո՛:
Ճառագա՛յթ փառաց, ճանապա՛րհ ինձ ցոյց՝ ճեպել ի յերկինս:
Միածի՛նդ Հօր, մո՛յծ զիս յառագաստ մաքուր հարսանեացդ:
Յորժամ գաս փառօք յահագին աւուրն, յիշեա՛ զիս, Քրիստո՛ս:
Նորոգո՛ղ հնութեանց, նորոգեա՛ եւ զիս, նորո՛գ զարդարեա:
Շնորհատո՛ւ բարեաց, շնորհեա՛ զքաւութիւն, շնորհեա՛ զթողութիւն:
Ուրախացո՛, Տէ՛ր, ոգւոյս փրկութեամբ, ոյր վասն եմ ի սուգ:
Չար մշակողին չար սերմանց նորին չորացո՛ զպտուղն:
Պարգեւի՛չ բարեաց, պարգեւեա՛ իմոց պարտեացս թողութիւն:
Ջո՛ւր շնորհեա աչացս՝ ջերմ հեղուլ զարտօսր, ջնջել զյանցանս:
Ռետի՛նդ քաղցու, ռամ հոգւոյս արբո՛, ռա՛հ ցոյց ինձ լուսոյ:
Սէ՛ր անուն Յիսուս, սիրով Քով ճմլեա՛ սիրտ իմ քարեղէն:
Վասն գթութեան, վասն ողորմութեան վերստի՛ն կեցո:
Տենչալւոյդ տեսլեամբ տո՛ւր ինձ յագենալ, Տէ՛ր Յիսուս Քրիստոս:
Րաբո՛ւնդ երկնաւոր, րոտեա՛ զաշակերտս րամից երկնայնոց:
Ցօղ արեան Քո, Տէ՛ր, ցօղեա՛ ի հոգիս, ցնծասցէ անձն իմ:
Ււծեալս մեղօք ւիւծեալ աղաչեմ ւիւսել ինձ բարիս:
Փրկի՛չ բոլորից, փութա՛ զիս փրկել փորձութեանց մեղաց:
Քաւի՛չ յանցանաց, քաւեա՛ զօրհնաբանս՝ Քեզ երգել զփառս:
Սրբուհւոյ Աստուածածնին բարեխօսութեամբ յիշեա՛, Տէ՛ր, եւ ողորմեա՛:

ԱՂՕԹՔ
ԶՔէն գոհանամք, Տէր Աստուա՛ծ մեր, որ շնորհեցեր մեզ հանգիստ քնոյ խաղաղութեամբ: Եւ զարթուցեալ ժամանեցուցեր զմեզ կանխել յերկրպագութիւն ահաւոր եւ փառաւորեալ անուանդ Քում սրբոյ: Տո՛ւր մեզ, Տէ՛ր, աղաչեմք զՔեզ, զմնացուած գիշերիս խաղաղութեամբ անցուցանել. եւ զամենայն ժամանակս կենաց պանդխտութեան մերոյ երկիւղիւդ Քո ամրացո՛ եւ պահեա՛: Որպէս զի զգուշութեամբ եւ անարատ վարուք կրօնաւորեալք յայսմ աշխարհիս՝ ժամանեսցուք յանքոյթ եւ ի խաղաղ նաւահանգիստ յաւիտենական ի կեանսդ՝ շնորհօք եւ մարդասիրութեամբ Տեառն մերոյ եւ Փրկչին Յիսուսի Քրիստոսի: Ընդ Որում Քեզ Հօր եւ Հոգւոյդ Սրբոյ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Նայեա՛ց, Տէ՛ր բարերար, ողորմութեամբ Քով յերկրպագուս եւ ի փառաբանիչս անուանդ Քում սրբոյ: Տէ՛ր զօրութեանց, խաղաղացո՛ զանձինս մեր յամենայն սատանայական խռովութեանց եւ յաշխարհական զբօսանաց: Զհրեշտակ խաղաղութեան Քո առաքեա՛ առ մեզ, որ եկեալ պահեսցէ զմեզ անխռովս ի տուէ եւ ի գիշերի, յարթնութեան եւ ի հանգստեան մերում: Որպէս զի բարեպաշտութեամբ եւ արժանաւորապէս Քեզ Տեառնդ ծառայելով ի կեանս յայսոսիկ՝ ժամանեսցուք յաւիտենական երկնից արքայութեան Քո, զոր պատրաստեցեր ի սկզբանէ աշխարհի սրբոց Քոց: Եւ ընդ նոսին գոհանալով փառաւորեսցուք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից:

Օրհնեալ Տէր մեր Յիսուս Քրիստոս. ամէն:
Ալէլուիա, ալէլուիա:

ԿԱՆՈՆ «Ողորմեա», ԲՁ (սաղմոս ԾԵ-ՀԱ)
Ձայն Տեառն ի վերայ ջուրց, եւ Աստուած փառաց որոտաց, եւ Տէր ինքն ի վերայ ջուրց բազմաց:

ԿԱՆՈՆԱԳԼՈՒԽ

ՍԱՂՄՈՍ Հ
Ի Քեզ, Տէ՛ր, յուսացայ, մի՛ ամաչեցից յաւիտեան. ալէլուիա. յարդարութեան Քում փրկեա՛ եւ ապրեցո՛ զիս. ալէլուիա:
Խոնարհեցո՛ առ իս զունկն Քո եւ կեցո՛ զիս:
Լե՛ր իմ, Աստուա՛ծ, ապաւէն եւ տեղի ամուր՝ կեցուցանել զիս, զի հաստատութիւն իմ եւ ապաւէն իմ Դու ես:
Աստուա՛ծ իմ, փրկեա՛ զիս ի ձեռաց մեղաւորի, ի ձեռաց անօրինի եւ անիրաւի:
Դու ես համբերութիւն իմ, Տէ՛ր. Տէ՛ր, յոյս իմ ի մանկութենէ իմմէ:
Ի Քեզ հաստատեցայ ես յարգանդէ, յորովայնէ մօր իմոյ Դու ես ապաւէն իմ, եւ առ ի Քէն է օգնութիւն իմ յամենայն ժամ:

ՍԱՂՄՈՍ ՀԱ
Փոխ. Երկիր պագցեն Նմա ամենայն թագաւորք երկրի, եւ ամենայն ազգք ծառայեսցեն Նմա. ալէլուիա, ալէլուիա:
Զի փրկեաց զաղքատն ի ձեռաց հզօրի, զաղքատն եւ զտնանկն, որոյ ոչ է իւր օգնական:
Անխայեսցէ Նա յաղքատն եւ ի տնանկն եւ զանձինս տնանկաց կեցուսցէ, ի վաշխից չարաց փրկեսցէ զանձինս նոցա:
Պատուական է անուն Նորա առաջի նոցա, կեցցէ եւ տացի նմա յոսկւոյն Արաբացւոց:
Յաղօթս կացցեն առ Նա յամենայն ժամ եւ զօրհանապազ օրհնեսցեն զՆա:
Եղիցի հաստատութիւն ընդ ամենայն երկիր եւ ի վերայ գլխոց լերանց:
Բարձրասցի քան զԼիբանան պտուղ նորա եւ ծաղկեսցի ի քաղաքի Տեառն որպէս խոտ երկրի:
Եղիցի անուն Տեառն օրհնեալ յաւիտեան, զի յառաջ քան զարեւ է անուն Նորա:
Ի Նա օրհնեսցին ամենայն ազգք երկրի, եւ ամենայն ազինք երանիցեն Նմա:
Օրհնեալ Տէր Աստուած Իսրայելի, որ առնէ սքանչելիս միայն, եւ օրհնեալ է անուն սուրբ փառաց Նորա յաւիտեան:
Լցցի փառօք Նորա ամենայն երկիր. եղիցի, եղիցի:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Ալէլուիա, ալէլուիա:

ԵՐԳ
Այսօր անճառ Լուսոյն ծագումն
Ի փրկութեան մեր կատարումն
Խոնարհի ի վերնատունն՝
Ի ստուերական տօնից լրումն:
Նախ քան զընթրիսն խորհրդոյ
Սփածաւ ղենջակ Արկողն լուսոյ
Եւ ջուր առեալ ծառայաբար՝
Զոտս լուանայր զաշակերտացն:

Բանին Հօր փառաց լուսոյ
Պետրոս մերձիլ յոտս ոչ ներէր՝
Այնմ, ձեռաց Որոյ են գործք
Երկնից երկինք եւ երկրաւորք.
Որով կուրաց աչք բացան,
Խուլք եւ համերք արձակեցան.
Որ վերածեաց զինքն ի ծովէն,
Սաստեաց ալեացն, եւ լռեցին:

Գլխոյն ընտրեալ հօտին փոքու
Սաստէր զխորհուրդն ոչ գիտելոյ,
Որով դառնայր եւ հնազանդէր,
Զոտս եւ զգլուխս մաքրել մաղթէր:
Գլխոյս, ասէ, չէ ինչ պիտոյ
Լուացումն ջրոյ, զի լուացեալ է.
Ոտիցդ պէտք են մաքրութեան՝
Յօդիլ ի գլուխս սրբութեամբ:

Դասուց Իւրոց աշակերտաց,
Զոր նախ բանիւ վարդապետեաց,
Այսօր գործով զծայրագոյնն
Եցոյց յԻնքեան զխոնարհութիւն.
Սպասաւորեալ հողեղինաց՝
Այն, որ անտեսն է հրեղինաց,
Տարեալ պաշտօն Իւր ծառայիցն՝
Այն, որ պաշտին ի սրովբէից:

Եթէ Տէրս, ասէ, էից,
Եւ Վարդապետս բոլորից
Զաշակերտացդ եւ զծառայից
Զոտս լուացի ի հնոյ աղտից,
Միմեանց եւ դո՛ւք համաբնութեամբ
Ցուցէք զնոյն խոնարհութիւն՝
Բարձրացելոյն ի կործանումն
Եւ անկելոյ բնութեանդ կանգնումն:

Զոր մաքրեցեր յաւազանին
Մաքուր ձեռօք զոտս նոցին
Եւ ուսուցեր խոնարհութեամբ
Յաղթող լինել չար հպարտին,
Եւ զի՛մ լուա զտիղմն մեղաց
Աղաչանօք սրբոյ գնդին.
Եւ զգնացս ուղղեա՛ զոտին
Խոնարհութեամբ ելիւք յերկինս:

Տարածեալ ձեռք ընդ ձեռաց,
Ոտք ընդ ոտից ընթանալեաց,
Փայտ ընդ փայտի, դառն պտղոյ
Կեանք ընդ մահու փոխարկելով՝
Ի մէջ երկուց անօրինաց
Կայր մերկացեալ տուողն օրինաց,
ԶՈր ոչ տեսին ազգն կուրաց՝
Բայց ի միոյն յաւազակաց:

Րոպէից արեգականն
Զտիւն արար գիշերանման,
Զստուերն քող արկ մերկութեանն,
Զի մի՛ տեսցէ ակն անարժան:
Ի միջօրեայն նսեմացաւ,
Յորժամ Ադամ մեղօք մեռաւ.
Ի յիններորդն ի լոյս դարձաւ,
Յորժամ մահուամբ մահն լուծաւ:

Ցօղէր արտօսր ցաւագին
Մայր Տեառն, որ կայր մերձ առ խաչին,
Յորժամ լսէր զծարաւին
Բարբառելոյ իւր Միածնին:
Ետուն քացախ խառնեալ լեղի
Այնմ, որ բղխեաց գետ յԱդենի
Եւ ի վիմէն վտակ բարի
Արբոյց տոհմին դառնացողի:

Ւիւծեալ յերրորդ ժամու օձին
Զմիտս նախնւոյ մօրն Եւայի,
Ի վեցն անկեալ մարդն առաջին
Հաւանական բանիւ նորին,
Ի սոյն ժամու՝ Տէրն ի խաչին,
Զի քաւեսցէ զմեղս նոցին:
Եւ յորժամ ել Ադամն հին,
Եդ զաւազակն ի մէջ դրախտին:

Փարելի բարբառ ընդ իմ
«Էլի, Էլի» առ Հայր գոչէր,
Զհոգին կամաւ Հօրն աւանդէր,
Զհոգիս մարդկան նոյն ընծայէր:
Երկիր հիմամբք սասանեցաւ,
Եւ վարագոյրն ընդ մէջ հերձաւ,
Վէմք ի յինքեանց պատառեցան,
Եւ գերեզմանք մահու բացան:

Քարոզի ի սքանչելեացս
Աստուած մարմնով վասն իմ խաչեալ.
Մերով բնութեամբս մեռանի,
Աստուած անմահ խոստովանի:
Կրկնավտակ կողին աղբերբք
Եկեղեցի Իւր հաստատի,
Ջրովն մաքրի, զարիւնն ըմպէ,
ԶՈրդի ընդ Հօր փառաւորէ:

ՍԱՂՄՈՍ Դ
Փոխ. Նշանեցաւ առ մեզ լոյս երեսաց Քոց, եւ ետուր ուրախութիւն սրտից մերոց:
Ի կարդալ իմում լուար ինձ, Աստուա՛ծ, ըստ արդարութեան. ի նեղութեան ինձ անդորր արարեր. ողորմեա՛ ինձ եւ լո՛ւր աղօթից իմոց:
Որդի՛ք մարդկան, մինչեւ յե՞րբ էք խստասիրտք, ընդէ՞ր սիրէք զնանրութիւն եւ խնդրէք զստութիւն:
Ծաներո՛ւք, զի սքանչելիս արար Տէր սրբոյ Իւրում. եւ Տէր լուիցէ ինձ ի կարդալ իմում առ Նա:
Բարկանայք՝ եւ մի՛ մեղանչէք. զոր ինչ ասէք ի սիրտս ձեր, յանկողինս ձեր զղջացարո՛ւք:
Մատուցէ՛ք պատարագս արդարութեան եւ յուսացարո՛ւք ի Տէր:
Բազումք ասէին, թէ՝ «Ո՞ ցուցցէ մեզ զբարութիւն Տեառն»:
Նշանեցաւ առ մեզ լոյս երեսաց Քոց, եւ ետուր ուրախութիւն սրտից մերոց:
Ի պտղոյ ցորենոյ, գինւոյ եւ ձիթոյ իւրեանց լցուցեր զնոսա:
Խաղաղութեամբ յայս եւ ի սոյն ննջեսցուք եւ զարթիցուք, զի Դու, Տէ՛ր, միայն առանձին յուսով Քով բնակեցուցեր զմեզ:

ԱՒԵՏԱՐԱՆ ԽԱՉԵԼՈՒԹԵԱՆ
(ԲՁ, ԴՁ)

Սրբոյ Աւետարանիս Յիսուսի Քրիստոսի, որ ըստ Մարկոսի
(գլ. 15.16-41)

Վասն չարչարանաց եւ խաչելութեան Տեառն մերոյ Յիսուսի Քրիստոսի

Եւ զինուորքն տարան զՆա ի ներքս ի գաւիթն, ուր հրապարակն էր, եւ կոչեն միանգամայն զամենայն զգունդն. եւ զգեցուցանեն Նմա քղամիդ կարմիր եւ ծիրանիս եւ եդին ի գլուխ Նորա պսակ՝ արարեալ ի փշոց. եւ սկսան ողջոյն տալ Նմա եւ ասել. «Ո՛ղջեր, Արքա՛յդ Հրէից»:
Եւ ծեծէին զգլուխն եղեգամբ եւ թքանէին ընդ երեսս եւ ի ծունր իջեալ՝ երկիր պագանէին Նմա:
Եւ իբրեւ կատակեցին զՆա, մերկացուցին զքղամիդն եւ զծիրանիս եւ զգեցուցին Նմա զԻւր հանդերձ եւ ածին արտաքս, զի ի խաչ հանցեն զՆա:
Եւ ունէին պահակ զՍիմոն Կիւրենացի, որ ընդ այն անցանէր՝ եկեալ յագարակէ, զհայրն Աղեքսանդրի եւ Ռուփայ, զի բարձցէ զխաչափայտն Նորա:
Եւ ածեն զՆա ի Գողգոթա տեղի մի, որ թարգմանի «տեղի կառափելոյ»:
Եւ տային Նմա գինի զմռսեալ, եւ Նա ոչ առ. եւ հանեն զՆա ի խաչ:
Եւ բաժանեցին զհանդերձս Նորա՝ արկեալ վիճակս ի վերայ, թէ ո զինչ առնուցու:
Էր ժամ երրորդ, եւ հանին զՆա ի խաչ:
Եւ էր գիր վնասու Նորա գրեալ, թէ՝ «Թագաւոր է Հրէից»:
Եւ ընդ Նմա հանին ի խաչ երկուս աւազակս՝ մի ընդ աջմէ եւ մի ընդ ահեկէ Նորա:
Եւ լցաւ գիրն, որ ասէ, թէ՝ «Ընդ անօրէնս համարեցաւ»:
Եւ որք անցանէինն, հայհոյէին զՆա՝ շարժեալ զգլուխս իւրեանց, եւ ասէին. «Վա՜հ, որ քակէիր զտաճարն եւ զերիս աւուրս շինէիր, ապրեցո՛ զանձն Քո եւ է՛ջ ի խաչէդ»:
Նոյնպէս եւ քահանայապետիցն այպն արարեալ՝ ընդ միմեանս հանդերձ դպրօքն ասէին. «Զայլս ապրեցոյց, զանձն ոչ կարասցէ ապրեցուցանել. Քրիստոսդ՝ Արքայդ Իսրայելի, իջցէ այժմ ի խաչէ այտի, զի տեսցուք եւ հաւատասցուք Դմա». եւ որ ընդ Նմա ի խաչն ելեալ էին, նախատէին զՆա:
Եւ իբրեւ վեց ժամ եղեւ, խաւար կալաւ զամենայն երկիր մինչեւ ցինն ժամ:
Եւ յիններորդ ժամուն աղաղակեաց Յիսուս ի ձայն մեծ եւ ասէ. «Էլի՛, Էլի՛, լամա սաբաքթանի», որ թարգմանի՝ «Աստուա՛ծ Իմ, Աստուա՛ծ Իմ, ընդէ՞ր թողեր զԻս»:
Եւ ոմանք ի նոցանէ, որ շուրջն կային զՆովաւ, իբրեւ լուան, ասէին, թէ՝ «ԶԵղիա կարդայ»:
Եւ ընթացեալ մի ոմն՝ ելից սպունգ մի քացախով եւ հարեալ յեղեգան՝ տայր ըմպել Նմա. եւ ասէ. «Թո՛յլ տուր, տեսցուք, գա՞յ Եղիա՝ իջուցանել զԴա»:
Եւ Յիսուս արձակեաց ձայն մեծ եւ եհան զոգի:
Եւ վարագոյր տաճարին պատառեցաւ յերկուս՝ ի վերուստ մինչեւ ի խոնարհ:
Եւ տեսեալ հարիւրապետին, որ կայր անդ, եթէ աղաղակեաց եւ եհան զոգի, ասէ. «Արդարեւ, Այրս այս Որդի Աստուծոյ էր»:
Էին եւ կանայք, որ հայէին ի հեռաստանէ, յորս էր Մարիամ Մագդաղենացի եւ Մարիամ Յակոբու փոքրկան եւ Յովսեայ մայրն եւ Սաղոմէ, որք, յորժամ էրն ի Գալիլեա, զհետ շրջէին Նորա եւ պաշտէին զՆա. եւ այլ բազում կանայք, որք ընդ Նմա իսկ եկեալ էին յԵրուսաղէմ:

ԵՐԳ
տեառն Ներսեսի

(ԲՁ, ԴՁ)

Ետուն ըմպել Քեզ զլեղին
Եւ զքացախն ի ծարաւին.
Արբեր կամաւ, զի քաղցրասցին
Ճաշակք պտղոյն դառնագունին:
Զդառնութիւն թիւնաւորին,
Զոր ի մասունս հոգւոյս արկին,
Հերքեա՛ ի բաց հանդերձ սովին,
Եւ քաղցրասցի սէր Քո ի սմին:

Ստեղնեալ ծառոյ մահաբերին՝
Այնմ, որ բուսաւ ի մէջ դրախտին,
Փոխան բարձեր զփայտ խաչին,
Ի Գողգոթա հաներ տեղին:
Զիմ առ ի մեղս անկեալ զոգի
Եւ ծանրագոյն բարձող բեռին
Բա՛րձ ի յուսոյդ ըստ ոչխարին,
Հա՛ն ի յերկինս յուխտեալ տեղին:

Ի յուրբաթու ժամ երրորդին
Բեւեռեցար, Տէ՛ր, ի խաչին,
Լուծեր զկապանս նախաստեղծին
Եւ կապեցեր զթշնամին:
Զիս ամրացո՛ ընդ հովանեաւ
Կենդանարար Քո նշանին
Եւ ի ծագելն յարեւելից
Լուսաւորեա՛ լուսով նորին:

Էրանեալ աւազակին
Բացեր զդուռն Ադին դրախտին.
Ըստ հաւատոյ սրտի նորին
Կատարեցեր զխնդրելին:
Տո՛ւր եւ ինձ, Տէ՛ր, ընդ նմին
Լսել զնոյն պատասխանին.
«Այսօր ընդ Իս իցես յԱդին՝
Ի հայրենիս քո առաջին»:

ԵՐԳ
Տրտմահաղորդ չարչարանօք
Ի յանձն առեր զմահ խաչին
Եւ փայտին բարձող եղեր
Վասն Ադամայ նախաստեղծին.
Ողորմա՛ծ Տէր, ողորմեա՛
Հոգւոցն մեր ննջեցելոց:

ՄԱՂԹԱՆՔ
Հոգւոցն հանգուցելոց, Քրիստո՛ս Աստուած, արա՛ հանգիստ եւ ողորմութիւն. եւ մեզ՝ մեղաւորացս, շնորհեա՛ զթողութիւն յանցանաց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն հանգուցեալ հոգւոցն աղաչեսցուք զՓրկիչն մեր Քրիստոս, զի զնոսա ընդ արդարսն դասեսցէ եւ զմեզ կեցուսցէ շնորհիւ ողորմութեան Իւրոյ:
Ամենակալ Տէր Աստուա՛ծ մեր, կեցո՛ եւ ողորմեա՛:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Քրիստոս Որդի՛ Աստուծոյ, անոխակա՛լ եւ բարեգո՛ւթ, գթա՛ Քո արարչական սիրովդ ի հոգիս հանգուցեալ ծառայից Քոց: Յիշեա՛ յաւուր մեծի գալստեան արքայութեան Քո: Արա՛ արժանի ողորմութեան, քաւութեան եւ թողութեան մեղաց: Դասաւորեալ պայծառացո՛ ընդ սուրբս Քո յաջակողմեան դասուն, զի Դու ես Տէր եւ Արարիչ ամենեցուն, Դատաւոր կենդանեաց եւ մեռելոց. եւ Քեզ վայելէ փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

ՄԱՂԹԱՆՔ
Քրիստոս Աստուա՛ծ մեր, անճառելի տէրութեանդ շնորհիւ եւ բարեխօսութեամբ օրհնաբանեալ անարատ ծնողիդ՝ սրբուհւոյ Աստուածածնին եւ միշտ Կուսին, լուսաւորեալ պայծառացո՛ զհոգիս համօրէն հաւատացելոց, յուսով ի Քեզ ննջեցելոց, եւ այնոցիկ, որք ընդ հովանեաւ սրբոյ տաճարիս են հանգուցեալ:

Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՇԱՐԱԿԱՆ ՕՐՀՆՈՒԹԵԱՆ

Օրհնութիւն վեցերորդ կիւրակէին Աղուհացից բձ.

(Օրհ. Մեծի պահոց Զ կիւրակէի բձ. Ա.)

Որ զխորհուրդ Քո գալստեանդ յառաջագոյն գուշակեցեր մարգարէիւքն Իսրայելի, զորս ընտրեցեր յետ Մովսեսի, որք խօսեցան Հոգւով Սրբով բազմապատիկ օրինակօք, տո՛ւր մեզ, Փրկի՛չ, ողորմութիւն եւ զմեղաց զթողութիւն:
Ի մերձենալ ամաց վերջին, զոր տեսանողքն ծանուցին, զհասանիլ մեր Փրկողիդ առ ի վախճան ժամանակին, երեւեցար ի մէջ մարդկան՝ զգեցեալ զկերպ ծառայական. տո՛ւր մեզ, Փրկի՛չ, ողորմութիւն եւ զմեղաց զթողութիւն:
Ի վեցերորդ աւուր զԱդամ ստեղծեր ի տիպ Քո տիրական, որ ոչ պահեալ զպատուիրանն՝ մերկացաւ զպատմուճանն, իսկ նոր Ադամդ ի վեց դարուն այց արարեր կորուսելոյն. տո՛ւր մեզ, Փրկի՛չ, ողորմութիւն եւ զմեղաց զթողութիւն:
Տաճա՛ր Լուսոյ անստուերին եւ առագա՛ստ անճառ Բանին, որ զնախնւոյ մօրն Եւայի բարձեր զանէծսն տրտմալի. հայցեա՛ յՈրդւոյ քո Միածնի՝ Հօր հաշտութեանն Միջնորդի, բառնալ ի մէնջ զխռովութիւն եւ տալ զոգւոց խաղաղութիւն:

(Օրհ. Մեծի պահոց Զ կիւրակէի բձ. Բ., 1-3 տներ)

Ըստ աւետեաց մարգարէին, որ առ փրկեալքս արեամբ Գառինդ, ցնծամք եւ մեք ծառք անտառի ընդ գալուստ Տեառնդ կրկնակի. շնորհեա՛ մեզ, Տէ՛ր, ընդ արդարոցն՝ ընդ առ ի Քէն տնկեալ ծառոցն, այժմ յուսով զուարճանալ եւ յերկրորդին ընդ Քեզ ցնծալ:
Սմին նման տայ աւետիս Զաքարիաս նոր Սիոնի, եթէ՝ «Ուրա՛խ լեր, ահա գայ առ Քեզ խոնարհ եւ հեզ Արքայ՝ նստեալ ի յէշ եւ յաւանակ՝ կրկին ազանց գոլ օրինակ». Նստեա՛լդ յաթոռ քերովբէից, նի՛ստ գթութեամբ ի մեր հոգիս:
Զահեղ փառաց Քոց երեւումն, որ լինելոց է յերկրորդումն, ետես Դաւիթ յառաջագոյն, ծանոյց կանխաւ ազդմամբ Հոգւոյն, թէ՝ «Յայտնապէս Աստուած գայցէ, հուր առաջի Իւր բորբոքէ». յայնժամ, Յիսո՛ւս, ի մեզ խնայեա, գթա՛, Քրիստո՛ս, եւ ողորմեա՛:

(Օրհ. Յարութեան Ղազարու բձ.)

Յաստուածային ձայնէ գոչմանն սարսեցին դողալով կարապետք դժոխոց, եւ մեռեալն եկն արտաքս անապական:
Կեցեալ ի դուրս այրին եւ ձայնէր ազդ արարող բարբառովն ի գերեզմանն. «Ղազարէ՛, ե՛կ արտաքս անապական»:
Ելեալ ի գերեզմանէն երիզապինդ պատանօքն մեռեալն, հրամայեաց լուծանել ի կեանսն յաւիտենից:

(Օրհ. Աւագ Բշ. բձ. Ա.)

Անեղն ի Հօրէ ծնեալ Որդի յանէից գոյացոյց զեղեալքս զերկնային եւ զերկրաւորս էութիւն. արարա՛ծք ամենայն, տո՛ւք փառս Արարչին յաւիտենից:
Պատկեր աներեւոյթ փառացն Հօր ի պատկեր բարերարութեան Իւրոյ արար զմարդկային բնութիւնս. արարա՛ծք ամենայն, տո՛ւք փառս Արարչին յաւիտենից:
Լոյսն ի Հօրէ լուսոյ ծագեալ՝ լուսափայլ զարդարեաց զԱդամ՝ ի դրախտին եդեալ անմահ տնկոցն երկրագործ. արարա՛ծք ամենայն, տո՛ւք փառս Արարչին յաւիտենից:

(Տրյ. Աւագ Գշ. բձ.)

Որ նստիս ի քրովբէս, Աստուա՛ծ Բանդ, այսօր վասն մեր խոնարհութեամբ նստար ի լերինն Ձիթենեաց. օրհնեմք զՔեզ անդադար երգով:
Որ համագոյդ ես խորհրդոցդ հայրենի, աշակերտաց Քոց ծանուցեր զխորհուրդ Քո գալստեանն. օրհնեմք զՔեզ անդադար երգով:
Որ ամենայնց ես արարիչ եւ ստեղծիչ կենդանութեան, այսօր զծածկեալ խորհուրդ Երրորդութեանդ յայտնեցեր Եկեղեցւոյ սրբոյ Քո. օրհնեմք զՔեզ անդադար երգով:

(Տրյ. ապաշխարութեան բձ. Ա.)

Որ ի վերդ ես քան զամենայն զմիտս եւ զխորհուրդս, փառա՛ց Թագաւոր, խնայեա՛ ի մեզ:
Որ միայն ունիս զանմահութիւն եւ զանեղութիւն, փառա՛ց Թագաւոր, խնայեա՛ ի մեզ:
Որ նստիս ի քրովբէս, Երրորդութի՛ւն անբաժանելի, փառա՛ց Թագաւոր, խնայեա՛ ի մեզ:
Որ երկրպագեալդ ես ի հրեշտակաց եւ ի մարդկանէ, փառա՛ց Թագաւոր, խնայեա՛ ի մեզ:

(Տրյ. ապաշխարութեան բձ. Բ.)

Օրհնեմք զՔեզ, անսկիզբն Հա՛յր. յամենայն ժամ օրհնութի՜ւն ի բարձունս:
Գովեմք զՔեզ, Միածի՛ն Որդի. յամենայն ժամ գոհութի՜ւն ի բարձունս:
Բարեբանեմք զՔեզ, Սո՛ւրբ Հոգի. յամենայն ժամ փա՜ռք Քեզ, Աստուա՛ծ:

(Տրյ. ապաշխարութեան բձ. Գ.)

Օրհնեսցուք եւ գովեսցուք, առաւել բարձր արասցուք եւ բարեբանեսցուք զանուն Քո, Փրկի՛չ. Քեզ վայելէ փառք:
Հրեշտակք եւ մարդիկ եւ ամենայն արարածոց լեզուք զՔեզ միայն օրհնեն, Փրկի՛չ. Քեզ վայելէ փառք:
Երկնային զօրութիւնքն անդադար օրհնութիւն մատուցանեն Քեզ, Փրկի՛չ. Քեզ վայելէ փառք:

(Ճշւ. Մեծ. Սուրբ Ծննդեան Զ աւուր բձ.)

ԶՔեզ, Հա՛յր՝ յառաջ քան զյաւիտեանս, բարեբանեն դասք անմարմնոց հրեշտակաց, ձայնիւ երգով գոչեն եւ աղաղակեն. «Աստուած աստուծոց եւ Տէր տերանց՝ Փրկիչ գոլով»:
Առաքեցեր զՔո Միածինդ՝ մարմնանալ ի սուրբ Կուսէն եւ անարատ ծնանիլ յորովայնէ անապական՝ բառնալով զմեր նեղութիւնս. Աստուած աստուծոց եւ Տէր տերանց՝ Փրկիչ գոլով:
Շնորհք բարի յԵրուսաղէմ երեւեցաւ հեթանոսաց, զի Արարիչն յաւիտենից տղայ եղեալ՝ յորդեգրութիւն կենաց կոչէ. Աստուած աստուծոց եւ Տէր տերանց՝ Փրկիչ գոլով:

(Օրհ. Խաչվերացի ուրբաթու բձ. Ա.)

Անապական սուրբ զխաչն օրհնեսցուք, որ եղեւ առաջնորդ աւազակին եւ յօրինեաց մեզ ճանապարհ, որ ձեւացոյց մեզ սովաւ մտանել ընդ դուռն անեղաշէն դրախտին Տեառն:
Բանալի արքայութեան տուաւ հողածին մարդոյն, ուստի յառաջին ճաշակմանէն արտաքս անկեալ ի յաւէժ կենդանութեան, որ ձեւացոյց մեզ սովաւ մտանել ընդ դուռն անեղաշէն դրախտին Տեառն:
Գաւազանաձեւ երեւեալ եգիպտական ազգին՝ ցուցանելով զզօրութիւն սրբոյ խաչին, յափշտակելով զգաւազանսն դիւթական, որ ձեւացոյց մեզ սովաւ մտանել ընդ դուռն անեղաշէն դրախտին Տեառն:
Դրոշմ զգայութեան օրինակեալ ի վերայ սեմոց դրանց նոցա՝ աներկիւղ պահելով զժողովուրդն յանդրանկածախ սատակմանէն, որ ձեւացոյց մեզ սովաւ մտանել ընդ դուռն անեղաշէն դրախտին Տեառն:
Երեւեալ աղիւսանման ակն պատուական ի ձեւ խաչին՝ հերձանելով զծովն Կարմիր, առաջնորդելով ժողովրդեանն սեամբ ամպոյ լոյսն անմեկնելի, որ ձեւացոյց մեզ սովաւ մտանել ընդ դուռն անեղաշէն դրախտին Տեառն:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

(Օրհ. Մեծի պահոց Զ կիւրակէի բձ. Բ., 4-րդ տուն)

Աստուածածի՛ն անհարսնացեալ, յերկրէ յերկինս հա՛րսն ընծայեալ, յորժամ բազմիս լուսոյ նման Քո Միածնիդ յաջակողմեան, յայնժամ մաղթեա՛ ընդ մեր զնոյն փրկել զմեզ յահեղ բոցոյն, համադասիլ ընդ արդարոց, երգել զփառս ընդ երկնայնոցն:

ՄԱՂԹԱՆՔ
Փա՜ռք հրաշափառ տէրութեան Քո, Որդի՛ Աստուծոյ. զօրհնեալ եւ զփառաւորեալ, զհրաշալի եւ զյաղթող զտէրութիւնն Քո սուրբ օրհնեմք եւ փառաւորեմք:
Մարդասէ՛ր Տէր, վասն սրբուհւոյ անարատի մօր Քո եւ Կուսի եւ վասն խաչի Քո պատուականի ընկա՛լ զաղաչանս մեր եւ կեցո՛ զմեզ:

ՔԱՐՈԶ
(ԲՁ, ԴՁ)
Վասն գտանելոյ մեզ զշնորհս եւ զողորմութիւն ի բարերար Տեառնէ մերմէ զՏէր աղաչեսցուք:
Տէ՛ր, ողորմեա՛:
Վասն փրկելոյ զմեզ ի զրպարտութենէ մարդկան եւ յորոգայթից սատանայի զՏէր աղաչեսցուք:
Տէ՛ր, ողորմեա՛:
Վասն ամենայն անձանց քրիստոնէից եւ տանց հաւատացելոց զՏէր աղաչեսցուք:
Տէ՛ր, ողորմեա՛:
Վասն որք ի լերինս, յայրս եւ ի փապարս բնակեալ են՝ սուրբ հարքն մեր, զՏէր աղաչեսցուք:
Տէ՛ր, ողորմեա՛:
Վասն որք սաղմոսիւք եւ օրհնութեամբ կատարեն զամենայն ժամանակս կենաց իւրեանց զՏէր աղաչեսցուք:
Տէ՛ր, ողորմեա՛:
Վասն հոգւոցն հանգուցելոց, որք ճշմարիտ եւ ուղիղ հաւատով ի Քրիստոս ննջեցին, զՏէր աղաչեսցուք:
Յիշեա՛, Տէ՛ր, եւ ողորմեա՛:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
(ԲՁ, ԴՁ)
Գոհանամք զՔէն, Տէր Աստուա՛ծ մեր, որ զարթուցեր զմեզ ի հանգստենէ քնոյ շնորհիւ ողորմութեան Քո: Զարթո՛ զմիտս մեր արդարութեամբ առ Քեզ, Տէր Աստուա՛ծ մեր, զի տեսցեն աչք մեր զփրկութիւն Քո: Եկեսցէ եւ բնակեսցի առ մեզ Աստուածութիւն Քո, եւ ողորմութիւն Քո հովանի եւ պահապան լիցի ի վերայ պաշտօնէից Քոց: Եւ զմեզ՝ զծառայքս Քո, արժանի՛ արա ի տուէ եւ ի գիշերի եւ յամենայն ժամու միշտ խորհիլ ի սէր պատուիրանաց Քոց եւ գոհութեամբ փառաւորել զՀայր եւ զՈրդի եւ զՍուրբ Հոգիդ այժմ եւ միշտ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Կենդանարար զօրութիւն եւ աղբիւր անմահութեան Դու ես, Քրիստո՛ս Աստուած Փրկիչ մեր, որ շնորհեցեր մեզ ի մէջ գիշերի յառնել եւ խոստովան լինիլ առ Քեզ վասն իրաւանց եւ արդարութեան Քո. եւ այժմ աղաչեմք զՔեզ, Տէր Աստուա՛ծ մեր, արա՛ զմեզ արթունս եւ պատրաստս ի ժամ առաւօտու ընդ սուրբս Քո եւ ընդ նոսին գոհանալով փառաւորել զՔեզ ընդ Հօր եւ ընդ Սուրբ Հոգւոյդ այժմ եւ միշտ եւ յաւիտեանս յաւիտենից. ամէն:

Ալէլուիա, ալէլուիա, ալէլուիա:
Ետուր երկիւղածաց Քոց նշան, զի ապրեսցին յերեսաց աղեղան: Որպէս փրկեցան սիրելիք Քո, կեցո՛ աջով Քով եւ լո՛ւր մեզ:
Փոխ. Ալէլուիա: Դու պատրաստեցեր զուղղութիւն եւ զիրաւունս. եւ զարդարութիւն Յակոբայ Դու արարեր: Բա՛րձր արարէք զՏէր Աստուած մեր, երկիր պագէ՛ք պատուանդանի ոտից Նորա, զի սուրբ է:
Փա՜ռք եւ երկրպագութի՜ւն Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Ալէլուիա, ալէլուիա, ալէլուիա:

ՄԱՂԹԱՆՔ
(ԲՁ, ԴՁ)
Գոհութեամբ եւ ճշմարիտ խոստովանութեամբ անդադար փառաւորեմք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն: